Read lunyore ETSISABURI 72 Bible Online

ETSISABURI 72 - lunyore bible

ETSISABURI 72

¹E Nyasaye, yekesia omuruchi obukhalachibwo obulunji; omuhelesiekhwo obukhalachi bubwo obwahabwene.

²Kho abe onyala okhwamiha abandu baabo munjila yatooto, khandi okhuruka abasandibwanga mubulunji.

³Lekha esibala sibe nende emiandu, lekha esibala sibemwo obulunji.

⁴Lekha Omuruchi akhalachile ababisandu munjila yatooto; abe ounyala khukhonya abatakhilwangwa, ma aleke yabo abasandianga abasiabwe.

⁵Lekha abandu baabo bakhwekayakaye oluhono lweliuba lisiakha; khandi oluhono lwomwesi kusibalanga, emihika eminji etsitsanga.

⁶Lekha omuruchi abe singa ifula ekwitsanga khumikunda, khandi singa olunyilila lweifula olukwitsanga khwiloba.

⁷Lekha obulunji bumeetekhe mubulamu bubwe bwosi, ma khandi obuhinda bumenye oluhono lwomwesi kusiakhanga.

⁸Obwami bubwe bulalanda okhurula khu Nyanza okhwola khunyanza yindi, khandi okhurula khumuchela kwa Efurate okhwola khusihesi siesibala.

⁹Abandu abamenyanga musitsiimi bakhamusikamila; ne abasuku baabe bakhakwe hasi.

¹⁰Abaruchi belihanga lia Tarishishi nende ebichinga bialio bakhamuhelesie ebihanwa; abaruchi be Buharabu nende Etsiopia balimuleer'ra ebihanwa.

¹¹Abaruchi bosi bakhamwinamile; ne abamahanga bosi bakhabe abarumikhili baabe.

¹²Asoolanga abatakha abamulakayilanga, nende yabo bosi abatakhiywe nende abaachaywanga.

¹³Ababelel'langa abatekhele nende abatakha, ahonianga obulamu bwe yabo abatakhiywe.

¹⁴Abasoolanga okhurula mukhusandibwa nende mubusoolo. Obulamu bwabwe nobwobukusi bweikulu khuye.

¹⁵Omuruchi amenye inziayo! Lekha ahebwe efetsa okhurula Ebuharabu; lekha asaayilwe tsinyinga tsiosi, lekha ikhabi ya Nyasaye ibe khuye khasotso.

¹⁶Emikunda chiabwe chibemwo ebiokhulia ebinji, ebikulu bibemwo ebiokhulia ebinji, singa ebikulu bia Lebanoni bibetsangamwo ebiakhulia ebinji. Lekha amataala kabwe ketsulemwo abandu, singa ebikuuri bietsulamwo obulimo.

¹⁷Eliira liomuruchi lirebil'lwa tawe, lekha ifuma yiye emenye oluhono singa eliuba. Abamahanga bosi bamwitsoomie, ma bareebe Nyasaye okhubalaamila tsikhabi singa abandu bamureebele omuruchi okhumenya mumulembe.

¹⁸Mwitsoomie OMWAMI, Nyasaye wa Isiraeli! Ye yenyene niye okholanga yaka.

¹⁹Mwitsoomie eliira lilie likhongo khulweinziayo! Obukhongo bubwe bwitsule musibala siosi. Amina! Amina!

²⁰Amasayo aka Daudi omusiani wa Yese kakamilanga hano.