Read lunyore ETSISABURI 73 Bible Online

ETSISABURI 73 - lunyore bible

ETSISABURI 73

¹Siahene Nyasaye nomulahi khu Isiraeli, khuyabo abali nemioyo emisiyikhu.

²Nebutswa ise ndali ahembi okhukosia obunaayi, obusubili bwanje bwali ahembi okhukwa,

³sichila ndali nikhayilwanga abekhonyi, olwa ndalola ebindu biosi nibekaasilanga ababi.

⁴Sibanyoolangakhwo okhusaalila tawe; nabakufu khandi abanera mumibili.

⁵Sibasalilangakhwo singa abandu bandi tawe, kata sibalikhwo namanyakhano singa akabandi tawe.

⁶Khulwako, bebiikhanga obwekhonyi singa ebiyuma mwikosi, khandi obulwani singa ekanzo yabwe.

⁷Emioyo chiabwe chihinianga amabi, ne amakani kabwe kaitsula nobukholi bwobusiamu.

⁸Batsekhel'langa abandu bandi nibaboola amarabba; nabekhonyi abaloosianga okhulilil'langa abandi.

⁹Banyekanga Nyasaye mwikulu, nibakhondokhondia abandu khusibala,

¹⁰ma kata abandu ba Nyasaye bene babakalukhile, ma basubile kosi akababoolanga.

¹¹Baboolanga, “Nyasaye sialamanya tawe; Oweikulu Okhusila sialarunilisia tawe.”

¹²Nimbwo ababi bafwana. Bayikura emiandu ne khandi batsilil'langa okhunyoola eminji okhumeetakhwo.

¹³Kho kakhaba akabutswa mbu ise ndasiiya omwoyo kwanje nirakholakhwo tsimbi?

¹⁴Ee Nyasaye, ibe wambana mukhusalila om'basu kwosi, obusia nobusia umbetsanga esinyasio.

¹⁵Nimba nindakhabooye amang'ana singa yako, sindakhafwan'ne mulala khubandubo tawe.

¹⁶Ndali okhuteema okhupaala khumunyakhano yiku, nebutswa bwali obutinyu khu ise

¹⁷okhwola olwa ndatsia mu Hekalu yiyo. Nilwo olwa ndali okhumanyilisia akakhekhole khubabi olunyuma.

¹⁸Ibe wakhabare habundu harelele, obakwisianga mubumululwi.

¹⁹Khase na khase bakhuywanga; bakhabe mubumalili bwesibi esikali.

²⁰Bali singa amalooro akakoranga mukamba tsuli. Olwe ibe obisukhanga OMWAMI nabo nibakhama.

²¹Olwa amakani kanje kali amalulu, ne okhwekomba khwanje nikhusalila,

²²ndali omuhingwa singa esolo; sindamanyilisia amang'ana kaako tawe.

²³Kata olwa menyanga ahembi n'nawe, nawe niundila omukhono.

²⁴Unyemel'langa namebaalo kaako, ne mukhumalila wakhambuchil'le noluyali.

²⁵Nisina sindi esiandi n'nasio mwikulu norali ibe? Ne olwa ndi n'nawe, nisina sindi esiandakhenya khusibala?

²⁶Amakani kanje nomubili kwanje binyala okhutofula, nebutswa Nyasaye niye tsingufu tsianje, niye yenyene owa ndakhanga khasotso.

²⁷Yabo abakhulekhanga nibakhwibil'la balatiba. Ibe olamulula yabo abarali abasubilwa khuibe.

²⁸Nebutswa ise, mako obukaasu okhuba ahembi khu Nyasaye, okhuba mubulindi bwo MWAMI omukhongo wa bosi, nende okhulandia emilimochie chiosi!