Read lunyore ETSISABURI 74 Bible Online

ETSISABURI 74 - lunyore bible

ETSISABURI 74

¹Busina okhwibiliiye singa mbu Ee Nyasaye? Wakhabetsanga nelirima khubandu bo bene inziayo?

²Witsul'le abandubo, aba weyel'la omwene mumatukhu ka khale aba wahiinia mubuhambe okhuba olwibulolwo. Witsul'le Esikulu sia Sayuni, aha wamenyanga.

³Ochenda khumakunda yaka kosi; abasuku befwe bali okhumulula siesindu siosi mu Hekalu.

⁴Abasukubo bahanzukha nomwekhoyo mu Hekalu yo, bareye mwo etsipendela tsiabwe singa esimanyilo siobulechi.

⁵Bali singa abandu bomutsuru, abaremakanga emisaala nende etsisoka tsiabwe.

⁶Bafunaka emiliango chiosi etsio khu Hekalu, netsisoka tsiabwe nende tsinyundo.

⁷Bafunaka Ehekalu yo ma nibachihambia nomulilo; Bafwabia habundu wo ahokhwekayakayila.

⁸Benya bakhumale nibakhutubula, basamba siahabundu hosi hatsienukhu musibala.

⁹Ebimanyilo biefwe biosi ebitsienukhu biabukulwa; abaroobi sibasikalakhwo tawe, ne abulaho omanyile yaka kalibaho khuluhono sina.

¹⁰Abasuku befwe balakhuchaya ibe okhwola lina Ee Nyasaye? Nabanyekenge elira lio inziayo noho?

¹¹Khulwa sina ibe wasuula okhukhukhonya ifwe? Busina oretsanga amakhono kaako emukongo?

¹²Nebutswa ibe obetsanga omuruchi wefwe okhurula mukhuchaaka, Ee Nyasaye. Ibe wakhuhonia hali akhenji.

¹³Khulwe tsingufutsio tsingali wakabukhania inyanza, notubula emirwe tsietsisolo tsiamwo;

¹⁴wali okhutubula omurwe kwebaka Lewiatsani,[5] nohaana omubili kwayo okhulibwa netsisolo tsiemusilangalangwe.

¹⁵Ibe wasenula ebitaho nende tsimoni tsiebitaho; wakhamia amaatsi kemichela emikali.

¹⁶Walomba om'basu nobutukhu, nora eliuba nende omwesi mubukono bwabio;

¹⁷Wasimikha tsinzakho tsiesibala, waloosia tsinyinga tsioluuya nende etsiobusindu.

¹⁸Nebutswa, E OMWAMI, witsul'le mbu abasuku baabo bakhutsekhel'langa ibe, mbu nabandu ababi abakhunyekanga ibe.

¹⁹Oralekha abandubo abatimi khubasuku babwe abalulu tawe. Orebil'la abandu baabo abakhupibwanga esibi tawe!

²⁰Witsul'le indakano eya wakhola n'nefwe. Buliho obulwani habundu hosi muliloba.

²¹Oralekha abasen'nwanga hasi basimbibwe emirwe tawe. Lekha yabo abali abamanani nende abatakha bakhwitoomie ibe.

²²Witse Nyasaye omanyie obwatooto bwesiina sisio, witsul'le mbu abandu ababi bakhutsekhel'langa ibe om'basu kwosi.

²³Orebil'la okhuhanzuukha khwoburima bwabasukubo, nokhukhupa liyoka khase okhwabasuku baabo bakholanga tawe.