Read lunyore ETSISABURI 75 Bible Online

ETSISABURI 75 - lunyore bible

ETSISABURI 75

¹Khukhupanga embwo khuibe E Nyasaye, khukhupanga embwo khuibe! Khuboolanga obwa oli omukhongo, nikhuboola khu akokhuchenya akawakhola.

²Nyasaye aboolanga mbu, “Ndamala okhurechekha inyinga yobukhalachi, ne ndakhakhalachile bosi habwene.

³Kata ebilonje biosi nibiakhatechela, esibala nasio nisirenga, ise naaralisie tsisinji tsiasio butinyu.

⁴Mbool'langa abekhonyi, ‘Murekhonya tawe,’ nende abasiamu, ‘Murechingil'le tawe.

⁵Murechinguula ikulu, kata okhul'loma nibekhupa khubilifu tawe.’ ”

⁶Obukhalachi sibwitsanga okhurula ebukwe, nohomba emasaba tawe, kata okhurula esinyolu nohomba enandete tawe.

⁷Nyasaye mwene niye omukhalachi, akhalachilanga abalala esiina nalekhela abandi.

⁸OMWAMI ali nesisanda mumukhonokwe, esitsuyemwo ewaini indulu eyoburimabwe. Achitsukhanga ne abasukube nibachinywa. Banywetsanga yosi okhwola khumburo yokhumal'likha.

⁹Nebutswa ise sindakhalekha okhul'loma khu Nyasaye wa Yakobo, nohomba okhwemba tsinyembo tsiokhumwitsoomia.

¹⁰Ye alafunaka tsingufu tsiabasiamu, nebutswa tsingufu tsiabalunji tsilametekha.