Read lunyore ETSISABURI 77 Bible Online

ETSISABURI 77 - lunyore bible

ETSISABURI 77

¹Ndakayanga butinyu khu Nyasaye yakhonye, ndakayanga butinyu naye yambulilanga.

²Olwa mbetsanga mumunyakhano, khabanga OMWAMI, obutukhu bwosi njingulanga amakhono kanje nimusaaya, nebutswa sinyoolanga obuhotselekhi tawe.

³Olwa mbaalanga khu Nyasaye, tsisoni tsimambanga; olwa nganil'langa, ndesikokanga.

⁴Achilanga nimba meso obutukhu bwosi; Ndi noburi mbu sinyala okhul'loma tawe.

⁵Nganil'langa khumatukhu akabira, ninzitsul'la emihika chia khale.

⁶Obutukhu bwosi mbetsanga mumapaalo amenji; Nganil'langa, ne kano niko aka ndereebanga omwene:

⁷“OMWAMI yakhakhusuule ifwe khasotso noho? Yakhabule okhuyanzisibwa n'nefwe khandi noho?

⁸Walekhele okhukhuyanza ifwe noho? Mbula lisubisio ie liahinibwaho noho?

⁹Nyasaye yakhaba niyayibiliye okhuba netsimbabasi noho? Oburima buba nibwabukuye obukono bwetsimbabasi tsitsie noho?”

¹⁰Nilwo olwa nase ndali okhuboola, “Akasalisianga omwoyo kwanje nikano mbu Nyasaye siasili owobunyali khandi tawe.”

¹¹Nanzitsul'lenje emilimochio emikhongo, OMWAMI; Nanzitsusie akokhuchenya akawakhola amatukhu kabira. Nanganil'le khu kosi akobunyalibwo.

¹²Nanganil'le khu kosi aka wakhola; nanganil'le khu kosi akobunyalibwo.

¹³Kosi akokholanga namatsienukhu, E Nyasaye. Abulaho Omunyasaye undi omukhongo singa ibe.

¹⁴Niwe Nyasaye okholanga akamangalimwa; wamanyia obunyalibwo mumahanga.

¹⁵Mubunyalibwo wasoola abandu baabo, abolwibulo lwa Yakobo nende Yosefu.

¹⁶Olwa amaatsi kakhulola, E Nyasaye, kali noburi, ne tsindungu tsieinyanza tsiatechela.

¹⁷Amalumbesi katsukhil'la hasi ifula; ikhupa yahukuma okhurula mumalesi, ne oluheni nilwakha tsimbeka tsiosi.

¹⁸Okhuhukuma khweikhupayo khwahulilikha, ne okhwakha khwoluheni nikhuhambia esibala; liloba nilitechela ma nilirenga.

¹⁹Wachenda mubikubuli hakari mumaatsi; wakhalania inyanza eyatsia olutungu, nebutswa ahaseena tsindubar'ro tsio sihalolekha tawe.

²⁰Wemel'la abandu baabo singa omwayi, Musa nende Haruni nibabalindile.