Read lunyore ETSISABURI 78 Bible Online

ETSISABURI 78 - lunyore bible

ETSISABURI 78

¹Muhulile amebaalo kanje, inywe abandu banje, nimurechelesia akamubool'langa.

²Nzia okhubool'la mumang'ana kabachesi, ninzinoosia amabiso okhurula khale,

³amang'ana aka khwahulila nende aka khwamanya, amang'ana akabakuka befwe bakhubool'la.

⁴Sikhulakabisa khubaana befwe tawe, khularibula khwisuuba elilondakhwo, akobunyali bwo MWAMI nende emilimochie emikhongo nende akokhuchenya aka yakhola.

⁵Yahaana amalako khubandu ba Isiraeli, nende amalakano khubolwibulo lwa Yakobo. Yebaal'la abakuka befwe nababool'la nabo bebaal'le abaana babwe amalakoke,

⁶kho lisuuba elilondakhwo nalio likamanye, ma nalio likaribule khubaana babwe.

⁷Munjila yiyi nabo khandi bakhasubila mu Nyasaye, ma balekhe okhwibil'la emilimochie, nebutswa bafumilenje amalako kaake.

⁸Barakhafwana abakuka babwe, abandu beindiri abarahulilanga Nyasaye, abobusubili bwabwe mu Nyasaye burali oburalilu, khandi abaratsilil'la okhuba abasubilwa khuye.

⁹Abandu ba Efuraimu, nibachinjile obuyingo nende etsisele, belukha khwitukhu liobulwani.

¹⁰Sibahesia indakano yabwe na Nyasaye tawe, basuula okhufumila lilakolie.

¹¹Bebil'la aka Nyasaye yali niyakhola, akamangalimwa aka bali mbaluutsi nakholanga.

¹²Nyasaye yakhola akokhuchenya mumoni mwabakuka babwe, mumikunda chia Soani musibala sie Misiri.

¹³Yakabukhania inyanza ma nababisisia hakari muyo; yasinjisia amaatsi singa amasisi.

¹⁴Yabemel'langa nelilumbesi m'basu, ne butukhu yabemel'langa nobulafu bwomul'lo.

¹⁵Yaaraka tsinyanda musitsiimi, nabaha amaatsi amenji singa akarulanga munyanza.

¹⁶Yahinia amaatsi okhurula mulwanda, ma nikelukha singa omuchela.

¹⁷Nebutswa batsilil'la okhwon'na Nyasaye, ne nibali musitsiimi, bakhol'la Oweikulu Okhusila indiri.

¹⁸Babikha Nyasaye khwiteemo kol'lani, khulwa okhumulaka abahe ebiokhulia ebia benyanga.

¹⁹Banyeka Nyasaye nibaboola, “Nyasaye yakhanyala okhuhaana ebiokhulia musitsiimi tooto?

²⁰Nitooto mbu yaaraka olwanda, ma amaatsi nikarula mulwanda; nebutswa yakhanyala okhukhuhelesia omukaati, ma ahelesie abandube inyama tooto?”

²¹Olwa OMWAMI yahul'la yaka yahambwa nelirima, naseera abandube nomul'lo, ne lirimalie khubo liametekha,

²²sichila babula obusubili muye, kata sibasubila mbu anyala okhubahonia tawe.

²³Nebutswa yal'loma nelikulu ikulu, nalaka emiliango chialio okhwikukha.

²⁴Nabahelesia obuswache okhurula mwikulu khulwa okhubarumila amana balie.

²⁵Balia ebiokhulia biabamalaika, khandi Nyasaye yabaha kosi akabenya.

²⁶Khandi yaruma omuyeka Kweikhumaatsi okhurula ebukwe, khandi yabuusia omuyeka Kweikhumaatsi okhurula enandete khulwe tsingufu tsitsie.

²⁷Yaruma ebisindu khubandu baabe ebinji biene singa omuyekhe kwokhunyanza.

²⁸Biakwa hasi hakari wekambi nende okhubotokhana amaheema kosi.

²⁹Abandu babilia ma nibekura; Nyasaye yabaha singa benyanga.

³⁰Nebutswa bali nibasili okhumala olusa lwabwe, ne nibasinyanya inyama yiyo muminwa,

³¹olwa Nyasaye yabahambila oburima, ma niyeera abasaatsa babwe abakufu, ababuukha abolukoosi mu Isiraeli.

³²Kata inyuma weyako, abandu batsilil'la okhwona; kata inyuma wokhubakhol'la kamangalimwake sibamusubila tawe.

³³Khulwako yaakamia amatukhu kabwe singa omuya, niyakamia obulamu bwabwe nelikhupako liamatetekhana.

³⁴Olwa yeera abalala khubo, abandi bamala bamukalukhile; beyamanga nibamusaaya obutinyu.

³⁵Betsul'la mbu Nyasaye nomulindi wabwe, mbu Owokhunyala Biosi yabahabina.

³⁶Nebutswa bamukaatilisia namang'ana kabwe, nibamukaata netsinimi tsiabwe.

³⁷Sibali abahulili khuye tawe, sibali abasubilwa khu indakano yabwe n'naye tawe.

³⁸Nebutswa Nyasaye yali owetsimbabasi khubandube. Yababeela tsimbi tsiabwe narabbamulula tawe. Hali akhenji yafumilanga lilekolie naralakhuula oburimabwe.

³⁹Yetsul'la mbu bo nabandu abafwitsanga, bali singa omuyeka okuhutsanga nikubira.

⁴⁰Bamukhol'la indiri hali khase nibali musitsiimi? Bamura musibeela hali khanga?

⁴¹Khase na khase baretsanga Nyasaye mwiteemo, nasalisia omwoyo kwa Nyasaye omutsienukhu wa Isiraeli.

⁴²Bebil'la obunyalibwe obukhongo, nende litukhu eliayabahonisiamwo khubasuku babwe

⁴³nakhola akamakana nende amangalimwa mumikunda chia Soani musibala sie Misiri.

⁴⁴Yakalukhania amaatsi mumichela okhukwa amatsahi, ne Abaamisiri sibali namaatsi kabanywa tawe.

⁴⁵Yaruma tsiisi hakari wabwe, etsia bakhondokhondia, nende amasele okhwononia esibala siabwe.

⁴⁶Yaruma tsisiche okhulia ebiraakwa biabwe, nende okhwononia emikunda chiabwe.

⁴⁷Yeera emisaala chiabwe chiewaini nende ifula yamachina, nakhuya emikhuyu chiabwe nende ebarafu.

⁴⁸Niyeera tsing'ombe tsiabwe nende ifula yamachina, ne emiruko chiabwe nende oluheni.

⁴⁹Yabaleer'ra esibi esikali, natsukhilil'la lilekolie nende oburimabwe khubo, ebietsa singa abarumwa bolufu.

⁵⁰Siyayikal'la lilekolie khubo, kata okhubahonokosia tawe. Nebutswa yabeera nende olumbe.

⁵¹Yeera abasiani bokhuranga mukhwibulwa ababandu ba Misiri bosi.

⁵²Ma niyemel'la abandube okhurula Emisiri singa omwayi, yababisisia musitsiimi.

⁵³Yabemel'la mumulembe, nabo sibaali noburi tawe; nebutswa inyanza yafuunikha abasuku babwe.

⁵⁴Yabaleera khusibalasie esitsienukhu, khusikulu esia ye omwene yahula nasileka.

⁵⁵Yakhungania bene sibala bali imbeli wa Baisiraeli, ma nakabula esibala siabwe khutsimbia tsia Isiraeli, khandi nahaana tsingo tsiabwe khubandube.

⁵⁶Nebutswa bakhol'la Nyasaye Wokhunyala Biosi indiri, nibamura mwiteemo. Sibafumila amalakoke tawe,

⁵⁷nebutswa bakhola indiri nibarabba nolukoosi, singa obwa bakuka babwe bali, abarasubilikha singa olusele olwekota.

⁵⁸Yabahambila lileko khulwa habundu ahechingu aha bekayakayilanga ebiniini. Ebiniini biabwe biamukhola okhuba nelirima likali.

⁵⁹Nyasaye yasinyikha olwa yabilola, khulwako yasuula abandube kupu.

⁶⁰Yebala liheema lie Shilo, habundu aha yamenyanga halala n'nefwe.

⁶¹Yahuchil'la abasuku befwe okhukhunuula Lisanduku Liamalako, esimanyilo siobunyalibwe nende obukhongo.

⁶²Yasinyikhila abandube bene, ma nabalekha abasuku babwe babeere.

⁶³Abasiani babuukha ber'rwa mwihe, ne abakhaana sibaali nende abokhubateesia tawe.

⁶⁴Abesaalisi bafwila mubulwani obululu, ne abakhasi babwe abalekhwa sibahuchil'lwa okhwekhuula tawe.

⁶⁵Olwokhumal'likha, OMWAMI yabuukha singa orula mundoolo; yali singa omundu omukufu otsatsal'le khulwa amalwa.

⁶⁶Yakhunga abasukube mubulechi bwokhumalikha khandi obwes'simba murwe.

⁶⁷Nebutswa yasuula abolwibulo lwa Yosefu, khandi siyayela olwibulo lwa Efuraimu tawe.

⁶⁸Mubukono yibwo yeela olwibulo lwa Yuda, nende esikulu sia Sayuni esia yayanza okhusila.

⁶⁹Habwene yaho yombokhakhwo Ehekaluye singa hango hahe mwikulu, yachiralisia singa esibala siene, esialindwa tsinyinga tsiosi.

⁷⁰Yeela omurumikhili we Daudi, yamuhinia mubwayilo bwemiruko,

⁷¹aha yaayanga emirukochie. Yamukhola omuruchi wa Isiraeli, omwayi wabandu ba Nyasaye.

⁷²Daudi yabalinda nomwoyo kwobwehaani sila obwekhotseli, nabemel'la mubusitsa.