Read lunyore ETSISABURI 80 Bible Online

ETSISABURI 80 - lunyore bible

ETSISABURI 80

¹Okhuhulile, E Omwayi wa Isiraeli; okhuhulile, omwemeli wesiayosio. Ibe owikhaye khulurubalwo ikulu wamakerubi waakhe,

²ma welolesie khutsimbia tsia Efuraimu, Benjameni nende Manase. Okhumanyie tsingufu tsitsio; witse okhusoole!

³Okhuchelesie ingo, E Nyasaye! Okhumanyie tsimbabasi tsitsio, nefwe khulahonibwa!

⁴Niluhono sina, OMWAMI Nyasaye Wokhunyala Biosi olwa nobe nelirima khubusaayi bwabandu baabo?

⁵Ibe ukhuhelesisie esibeela singa esiokhulia siefwe, khandi khunywelanga mus'sanda esikali esitsuyemwo amasika.

⁶Wahuchil'la amahanga akakhubotokhana okhulwana esibala siefwe; abasuku befwe bakhunyekanga.

⁷Okhuchelesie ingo Nyasaye Wokhunyala Biosi! Okhumanyie tsimbabasi tsitsio, nefwe khulahonibwa!

⁸Wakhuler'ra omusabibu okhurula Emisiri, wakhunga amahanga kandi ma nokusimikha musibala siabwe.

⁹Waremula omukunda khulwo khukhul'la mwo, kwayila emisi chiakwo ehale, nichilanda khwiloba liosi.

¹⁰Kwafunikha ebikulu nende esiinikha siakwo, tsisaka tsiakwa tsiasinga emisiita emikali.

¹¹Tsisaka tsiakwo tsiarambia okhwola khunyanza ya Mediterenia, kata nende ehale bwene okhwola khumuchela kwa Efurate.

¹²Busina nofunaka tsinzakho etsiakubotokhana? Luno omundu wosi obiranga anyala okhwiba amakhuyu kakwo.

¹³Tsimbitsi tsiomubulimo tsikusen'nanga hasi, ne tsinyama nabulimo tsikulitsanga.

¹⁴Okhukalukhile, Nyasaye Wokhunyala Biosi! Okhuhengekhwo okhurula mwikulu; witse ohonie abandu baabo.

¹⁵Witse ohonie omusabibu okwa wasimikha yiku, omusabibu omutoro okwawakhusia nokukufuhasia!

¹⁶Abasuku befwe bakuhambiamwo omul'lo ma nibakurema; obahengekhwo mwileko ma obamulule.

¹⁷Osinge ma soole abandubo abawela, lihanga elia wakufuhasia.

¹⁸Sikhwakhakhulekhekhwo khandi tawe; okhuhe obulamu nefwe khulakhwitsoomia.

¹⁹Okhuchelesie ingo, OMWAMI Nyasaye Wokhunyala Biosi. Okhumanyie tsimbabasi tsitsio, nefwe nakhuhonibwe.