Read lunyore ETSISABURI 81 Bible Online

ETSISABURI 81 - lunyore bible

ETSISABURI 81

¹Mukhupe liyoka liobusangali khu Nyasaye omusooli wefwe; mwembe nimwitsoomia Nyasaye wa Yakobo!

²Muhinie amayoosi nimusasia amanyanga; mukhupe tsinyembo khumalele nende khumatungu.

³Mukhupe olwika lwelisabo, olwa omwesi kulabile khandi olwa kulolekhanga kwosi.

⁴Yili nilio lilako mu Isiraeli, okhulaka okhurula khu Nyasaye wa Yakobo.

⁵Yalihaana khubandu ba Isiraeli, olwa yaseera esibala sie Misiri. Mbul'langa omwoyo okuramanyikhile nikuboola,

⁶“Ndali okhuhiinia obusiro okhurula khumikongo chienywe; ndali okhumuhuchil'la okhuruula emisiko chienywe chiamatifali.

⁷Olwa mwali mumunyakhano, mwalanga khu ise, ma nase nimusoola. Ndali omukalusia nindi mubwebiso bwanje mumbumbuyeka. Ndali khumuteema hamaatsi ka Meriba.

⁸Muhulile lichetsiyio lianje inywe abandu banje; Isiraeli, mako obwa ndekombanga mbu wakhambulila!

⁹Murakhekayakayakhwo Nyasaye undi tawe.

¹⁰Ise nise OMWAMI Nyasaye wenywe, owamuhinia musibala sie Misiri. Mwikule eminwa chienywe nase namulisie.

¹¹“Nebutswa abandu banje sibaimbulila tawe; Isiraeli siyayenya okhulonda amalako kanje tawe.

¹²Kho ndali okhubalekha okhutsia mutsinjila tsiabwe tsimbi, nende okhukhola kosi aka benyele.

¹³Mako obwa ndekombanga mbu abandu banje bakhambulila, mako obwa ndekombanga balonda amalako kanje!

¹⁴Bwangu bwangu ndakhaleka abasuku babwe, nimulula abasuku babwe bosi.

¹⁵Yabo abambihil'lwanga bakhanzinamila muburi; esinyasio siabwe siakhahindila inziayo.

¹⁶Ne ndakhamufwita inywe nende ingano inyukhe, nimwikusia nobukhi bwanje obwomutsuru.”