Read lunyore ETSISABURI 83 Bible Online

ETSISABURI 83 - lunyore bible

ETSISABURI 83

¹E Nyasaye, orasiling'ana tawe; orekhala, kata orabuna tsi tawe.

²Lola! Abasuku baabo bakholanga indiri, ne yabo abakhubihil'langa bakhukhol'langa indiri.

³Bakholanga obusiemani bwamambiswi khubandu baabo, basiemananga yabo abosoolanga.

⁴Baboolanga, “Hambe khwononie lihanga liabwe, kho Isiraeli yibil'lwe khulwe inziayo.”

⁵Bahuchilisanianga khubusiemani bwabwe, nibalomba obuhambani bwokhukhufukula ibe.

⁶Nabo nabandu ba Edomu nende Abaishimaeli; abandu ba Moabu nende Abahagiri,

⁷abandu be Gebali, Amoni nende Amaleki, nende Filisiti nende Tiro.

⁸Khandi Asiria bababukiye, singa abasuku bakufu bolwibulo lwa Loti,

⁹obakhol'le singa obwa wakhol'lakhwo Abaamidiani, nende singa obwa wakhol'lakhwo Sisera na Yabini hamuchela kwa Kishoni.

¹⁰Wabalekela Endori, ne emibili chiabwe chiabol'la khuliloba.

¹¹Okhol'le abemeli babwe akawakhol'lakhwo Orebu nende Sebu, oleke abemeli babwe singa waleka Seba nende Salimuna.

¹²Abali okhuboola, “Nakhwebukul'le abene esibala sia Nyasaye.”

¹³Obasalanie singa olukhuukhi, E Nyasaye, singa omukhuutsi okuhilwanga nende omuyeka.

¹⁴Singa omul'lo okusambanga omutsuru, singa tsinzekhele etsihambianga omul'lo khubikulu,

¹⁵obakhunge nende imbumbuyekayo, ma obatechesie nomuyekakwo omululu.

¹⁶Obikhe tsisoni mumoni tsiabwe, ma obakhole bahuchil'le obunyalibwo.

¹⁷Lekha balekwe nibarisibwa inziayo; lekha bafwile mutsisoni.

¹⁸Bamanye mbu ibe wenyene niwe OMWAMI, omuruchi omukhongo khusibala siosi.