Read lunyore ETSISABURI 85 Bible Online

ETSISABURI 85 - lunyore bible

ETSISABURI 85

¹OMWAMI, ibe obetsanga owetsimbabasi khusibala sisio, uhindihasisie Isiraeli khandi.

²Walekhela abandu baabo tsimbi tsiabwe, nobabeela obubi bwabwe bwosi.

³Siwatsilil'la okhubahambila lileko tawe, niwikal'la oburima bubwo obululu.

⁴Okhukalusie mung'ono E Nyasaye omusooli wefwe, ma olekhe okhutsilil'la okhukhusinyikhila!

⁵Wakhakhuhambilenje lileko inziayo noho? Lileko lilio siliakhahwe tawe?

⁶Okhukufuhasie khandi, nefwe abandubo nakhukhwitsoomie.

⁷Okhumanyie obuyanzibwo oburalilu, E OMWAMI, ma okhuhabine nobukhonyi bwokhuhonia.

⁸Mbuyianga ako OMWAMI Nyasaye aboolanga; akhusubisianga ifwe, abandube bene omulembe, nikhuba nikhurakalukha mutsinjila tsiefwe tsiobuhingwa.

⁹Siahene yenyanga okhusoola yabo abamufumianga, ne obusooli bubwe busikala khusibala siefwe.

¹⁰Obuyanzi nende obusubilwa bilaakana; obulunji nomulembe bilafumbilana.

¹¹Obusubilwa bwomundu bulasenukha okhurula khwiloba, ne obulunji bwa Nyasaye buleekha okhurula mwikulu.

¹²OMWAMI alakhuhindihasia, ne esibala siefwe silaama ebiamo ebinji.

¹³Obulunji bulatsia imbeli wo OMWAMI nibumurechekhela injila.