Read lunyore ETSISABURI 86 Bible Online

ETSISABURI 86 - lunyore bible

ETSISABURI 86

¹Umbulile OMWAMI ma ungalusie, okhuba ndi omutambi khandi omutofu.

²Umbonie khulufu sichila ndi omusubilwa khu iwe; umbonie okhuba ndi omurumikhili uwo khandi subilanga mu ibe.

³Ibe niwe Nyasaye wanje, khulwako umbeele tsimbabasi, saayanga khuibe om'basu kwosi.

⁴Osangasie omurumikhili uwo, E OMWAMI, sichila amasaayo kanje ngachoomianga khuibe.

⁵Oli omulahi khu ifwe khandi wokhukhulekhela, obuyanzi bubwo oburalilu nobwinji khu yabo abakhusaayanga ibe.

⁶Ohulile okhusaaya khwanje, OMWAMI; ohulile okhulakaya khwanje khwokhureeba obukhonyi.

⁷Nanganga khuibe munyinga tsiomunyakhano, sichila okalusianga amasaayo kanje.

⁸Abulaho nyasaye undi singa ibe, E OMWAMI, abulaho owakholakhwo aka ibe wakhola.

⁹Amahanga kosi akawalonga kaletsa okhwekayakaya imbeliwo, kaletsoomia obukhongobwo.

¹⁰Ibe oli omukufu khandi okholanga akokhuchenya, ibe wenyene niwe Nyasaye.

¹¹Unzibaal'le aka wenyanga ise khole, OMWAMI, nase ndakhakhuhulila mubusubilwa. Unzibaal'le okhukhurumikhila nobwehani bwosi.

¹²Nakhwitsoomie nomwoyo kwanje kwosi, E OMWAMI Nyasaye wanje. Nangambe akobukhongo bubwo inziayo.

¹³Mako obwobuyanzibwo oburalilu buli obukhongo khu ise! Ibe wambabina musilindwa siene.

¹⁴Abandu abekhonyi betsanga okhuufukula, E Nyasaye; omukanda kwabandu abalulu kuteemanga okhunzira, abandu abarabukulangakhwo obukono mu ibe tawe.

¹⁵Nebutswa ibe, E OMWAMI obetsanga Nyasaye owetsimbabasi khandi owobuyanzi, omwesimilisi, omulahi khasotso khandi omusubilwa.

¹⁶Ungalukhile ma umbeele tsimbabasi, ungufuhasie ma umbonie, sichila rumikhilanga ibe singa oli mama wanje.

¹⁷Umanyie esimanyilo siobulahibwo, OMWAMI; yabo abambihil'lwanga balasimba emirwe, olwa balola niumbotselesisie khandi niukhonyele.