Read lunyore ETSISABURI 89 Bible Online

ETSISABURI 89 - lunyore bible

ETSISABURI 89

¹E OMWAMI, nanyembenje akobuyanzibwo oburalilu khasotso; nanonde obusubilwabwo inziayo.

²Manyile mbu obuyanzibwo nabumenye amatukhu kosi, khandi obusubilwabwo buralilanga inziayo singa likulu.

³Ibe waboola mbu, “Mal'le okhulomba indakano nomundu owa ndeela. Subisisie omurumikhili wanje Daudi,

⁴mbu ‘Es'sonisio siakhamihe amatukhu kosi; ndakharalisie olwami lwo inziayo.’ ”

⁵Likulu liembanga khukemilimochio echiokhuchenya echiokholanga; abatsienukhubo bembanga khukobusubilwa bwo, OMWAMI;

⁶Abulaho ofwana ibe mwikulu, OMWAMI; bosi khubamenyanga mwikulu sibahelana n'nawe tawe.

⁷Ibe oribwanga musiina siabatsienukhu; ne bosi batechelanga imbeliwo.

⁸OMWAMI Nyasaye Owokhunyala Biosi, abulaho omukufu singa ibe; mumang'ana kosi oli omusubilwa E OMWAMI.

⁹Wamihanga ikulu weinyanza ingali, olenjesianga amarunda kayo amahulu.

¹⁰Watubula okundu okulangwanga Rahabu ma nokwira; khulwo obunyalibwo waleka abasuku baabo.

¹¹Likulu nelilio, khandi esibala nesisio, ibe walomba esibala nende ebindu biosi ebilimwo.

¹²Walomba biosi ebili esinyolu nende biosi ebili enandete; Esikulu sia Tabori nende esia Hamoni, bikhwembelanga ibe khulwo obusangali.

¹³Mako obwa oli omukufu okhusila! Mako obwe tsingufutsio netsingali!

¹⁴Obwamibwo busimikhwanga khukatooto nende obulunji; obuyanzi nende obusubilwa bimanyibwanga mumilimo chio.

¹⁵Nabeikhabi yabo abakhwekayakayilanga mutsinyembo, abamenyanga mubulafu bwetsimbabasi tsitsio.

¹⁶Basangalanga om'basu kwosi khulwe ibe, khandi nibakhwitsomia khulwa obulahi bubwo.

¹⁷Ibe okhuhetsanga obulechi obukali, okhukufuhasianga mubuyanzi bubwo.

¹⁸Ibe, E OMWAMI weela omusooli wefwe; ibe Nyasaye Omutsienukhu wa Isiraeli wakhuhelesia omuruchi wefwe.

¹⁹Mumatukhu kakhale mumabisulo wabool'la omurumikhiliwo omusubilwa mbu, “Mban'ne obukhonyi khumusikari owamanyikha; mban'ne indebeyo lwami khumundu owandeela mubandu.

²⁰Mbikhile omurumikhili wanje Daudi okhuba omuruchi, mutsukhiliyekhwo amafura amatsienukhu.

²¹Tsingufu tsianje tsilabetsanga n'naye khasotso, obunyali bwanje bulamukufuhasia.

²²Abasukube sibalamuyembel'langa tawe; ababi sibalamuleka tawe.

²³Nandubule abasukube, ninzira bosi abamubihil'lwanga.

²⁴Namuyanze ma nambe omusubilwa khuye, namukhole okhuba nobulechi inziayo.

²⁵Nangalihie obwamibwe nibumeetekha, okhurula khunyanza ya Mediterenia okhwola khumuchela kwa Efurate.

²⁶Nayambool'le, ‘Niwe Papa khandi Nyasaye wanje; ibe oli omulindi wanje khandi omulina wanje.’

²⁷Namukhole okhuba omwana wanje owokhuranga, omukhongo mubaruchi bosi.

²⁸Ndahesinjie lisubisio lianje khuye khasotso, ne indakano yanje yakhabetsenjeho inziayo.

²⁹Ndakharalisie olwamilwe inziayo; olwibulolwe lwakhamihe oluhono olwe likulu lisili ho.

³⁰“Nebutswa abolwibulo lwe nibarafumila amalako, ma nibamenya nibaralondanga amalako.

³¹Nibarakhalonda amebaalo kanje, nende okhulinda amalako kanje,

³²ndakhabahe esinyasio khulwe tsimbi tsiabwe, ndakhalekhe basalile khulwo busiamu bwabwe.

³³Nebutswa sindakhalekhe okhuyanza Daudi tawe, kata okhubula okhuhesia lisubisio lianje khuye tawe.

³⁴Sindakhafunake indakano yanje n'naye tawe, kata sindakhakalukhaniakhwo elala khumasubisio kandamuhelesia tawe.

³⁵“Ndali okhusubisia neliira lianje litsienukhu. Sindakhakaata Daudi tawe.

³⁶Alabetsanga nebisoni khasotso, nase nanindenge obwamibwe oluhono lwe eliuba lisibalanga.

³⁷Ndakhabeho khulwe inziayo singa omwesi kubetsangaho khasotso, omukobokheli omusubilwa ula we likulu.”

³⁸Nebutswa ibe uhambiye omuruchi owaweela lileko; umulekhele ma umwanzukhiye.

³⁹Ufunachile indakanoyo nomurumikhili uwo, ma ufuubile olusimbilwe mumatohi.

⁴⁰Ulikuliye amasisi kelitookho lie, ma ulekhele amasisi koluhinga lwe mubusasikhi.

⁴¹Bosi ababir'rangaho bayaakanga ebindu bibie, ne abarende babe bamutsekhel'langa.

⁴²Uhelesisie abasukube obulechi, ubakhol'le okhuba nobusangali.

⁴³Ibe ukhol'le ebilasan'nwebie okhuba ebia butswa, ma ulekhele alechelwe mwihe.

⁴⁴Uhinisie khuye olwanzilo lwoburuchi, nofuuba indebe yobwamibwe mumaloba.

⁴⁵Umukhunguhisie inyingaye neroola nimuha tsisoni.

⁴⁶OMWAMI, wakhebise inziayo noho? Lilekolio liakhatukhe singa omul'lo okhwola lina?

⁴⁷Witsul'le mbu obulamu bwanje nobwimbichiti, witsul'le mbu wakhulomba ifwe abokhufwa.

⁴⁸Niwina owakhamenya narafwakhwo tawe? Omundu yakhanyala mbwena okhwebisa okhurula khusilindwa?

⁴⁹OMWAMI, ebimanyilo biobuyanzibwo bili hena? Amasubisioko khu Daudi kali hena?

⁵⁰Orebil'la obwe ise, omurumikhiliwo nyekwanga tawe, obwa ndefwilanga amanyeko kabandu abarakhusubilanga ibe.

⁵¹Abasuku bo banyekanga omuruchiwo omwelwa, Ee OMWAMI, Bamunyekanga hosi ahatsitsanga.

⁵²OMWAMI afumibwe inziayo! Amina! Amina!