Read lunyore ETSISABURI 94 Bible Online

ETSISABURI 94 - lunyore bible

ETSISABURI 94

¹OMWAMI, ibe oli Nyasaye ohaananga esinyasio khubandu; manyia lirima lilio!

²Ibe oli omukhalachi wabandu bosi; sinjila ma ohelesie abelolanga akabakhoyele okhunyoola.

³Kalabukula luhono sina ababi okhutsilil'la okhusangala? Kalabukula luhono sina, OMWAMI?

⁴Kalabukula luhono sina abandu babi okhutsilil'la okhwelol, nende okhwekhonya khumabi akabakholanga?

⁵Batubulanga abandu baabo mubitonye, OMWAMI, bakhupianga abandu baabo esibi.

⁶Beeranga abakhasi abalekhwa nende abaana ababisandu, nibasinza abacheni abamenyanga musibala siefwe.

⁷Baboolanga, “OMWAMI siakhulolanga tawe; Nyasaye wa Isiraeli siakhulolanga tawe.”

⁸Abandu banje, inywe mwakhakoyana mbwena singa abahingwa? Nilina mwakheke okhumanyilisia?

⁹Nyasaye niye owalomba amarwi kefwe — kho siali onyala khuhul'la tawe? Yalomba tsimoni tsiefwe — siali onyala khulola tawe?

¹⁰Nyasaye niye owinjiliye abamahanga — kho yakhabula okhubahelesia esinyasio noho? Niye omwibali wabandu bosi — kho siali niye mwene obuchesi?

¹¹OMWAMI wamanya amapalo kabandu.

¹²Nowobusangali omundu wo MWAMI yebaal'langa, owe ibe OMWAMI wechesianga amalako!

¹³Omuhetsanga abuhuluukhi mumatukhu komunyakhano, okhwola olweliko liyabwa eliokhutil'lamwo ababi.

¹⁴OMWAMI sialabebil'la abandu babe tawe, sialalekha abandu babe tawe.

¹⁵Obukhalachi bwatooto bulabaho musiina khandi; ne abandu abalunji balasanga khubukhalachi yibwo.

¹⁶Niwina owasangilana n'nase okhufukula ababi? Niwina owali khulubeka lwanje khulwo khufukula abakholi bamabi?

¹⁷Kalaba OMWAMI siyaikhonya tawe, khane ndatsia bwangu musibala siabafu!

¹⁸Nimboola, “Ise ngwitsanga;” nebutswa obuyanzi bubwo oburalilu bwandetel'la ise E OMWAMI.

¹⁹Olwa mbetsanga nende okhwekomba nende esihenda mwoyo, umbotselesianga nende okhusangasia.

²⁰Obulakhwo nobuhambani nende abakhalachi ababatsa, abakhalakanga emise oburalonda amalako.

²¹Abaloosianga okhwira abandu abalahi, ma bakhalachila abandu abarali nesikha okhufwa.

²²Nebutswa OMWAMI yasoolanga; Nyasaye wanje yanindanga.

²³Alabahelesia esinyasio khulwa amabi kabwe, khandi alabeera khulwe tsimbi tsiabwe, OMWAMI Nyasaye wefwe alabera.