Read lunyore ETSISABURI 97 Bible Online

ETSISABURI 97 - lunyore bible

ETSISABURI 97

¹Inywe abomusibala musangale, sichila OMWAMI niye Omuruchi! Inywe abandu bokhuluchinga lweinyanza musangale!

²Amalumbesi nende esiilima bimufumbilanga; yamihanga esibala mubulunji nende mubwatooto.

³Omul'lo kwemelanga imbeli uwe, nikusamba abasuku bamubotokhan'ne.

⁴Oluheni lulwe lwakhianga obulafu musibala; esibala sibulolanga ma sitechela.

⁵Ebikulu bikhamulukha imbeli wo MWAMI singa esinda, imbeli wo MWAMI wesibala siosi.

⁶Likulu lirubula obulunji bubwe, ne abamahanga kosi balola obukhongo bubwe.

⁷Buli mundu wosi owekayakayanga ebiniini alasimbibwa murwe; abanyasaye bosi bamusikamilanga OMWAMI.

⁸Abandu ba Sayuni basangaye, ne amatookho kosi ake Ebuyahudi kayanzileye, khulwo bukhalachi bubwo, E OMWAMI.

⁹Nyasaye Wokhunyala Biosi, niwe omuruchi wesibala siosi, ibe oli Omukhongo khuyomba abanyasaye bandi bosi.

¹⁰OMWAMI ayanzanga yabo bosi abasulanga amabi; alindanga obulamu bwabandu abatsienukhu baabe; abasoolanga okhurula khubunyali bwababi.

¹¹Obulafu bwakhanga khubalunji, ne obusangali bwakhanga khubalahi.

¹²Inywe mwesi abali abalunji musangale, khulwe yako ako MWAMI yakhola! Mwitsul'le aka Nyasaye Omutsienukhu yakhola, ma mumukhupile embwo.