Read lunyore TSINJELO 1 Bible Online

TSINJELO 1 - lunyore bible

TSINJELO 1

¹Tsino ne tsinjelo tsia Solomoni omusiani wa Daudi, khandi owali omuruchi wa Isiraeli.

²Tsinjelo yitsi tsimanyianga abandu amang'ana kobuchesi nende amebaalo amalahi nende okhumanyilisia amang'ana mubifune biomuusi.

³Tsiibaal'langa abandu obwa banyala okhumenya mubuchesi nende obwa banyala okhuba abasubilifu, abalunji khandi abahabwene.

⁴Tsihaananga amachesi khubandu ababula n'nako, ne khubabuukha tsibahelesianga obuchesi nende obumanyilisi.

⁵Tsinjelo yitsi tsimeetanga omundu omuchesi okhuba nobumanyi obwinji ne nitsihaana amebaalo khumundu owasoma,

⁶kho bosi babe abanyala okhumanyilisia ebifune biomuusi bietsinjelo nende amang'ana kabachesi halala nende ebitandawili bietsimbila tsiosi.

⁷Okhuhelesia OMWAMI oluyali nibwo obuchachilo bwobumanyi; abahingwa bachaayanga obuchesi khandi basuulanga amebaalo.

⁸Omwana wanje, hulila amang'ana kapapa uwo, nende mamawo bakhubool'langa.

⁹Obwibaali bwabwe bulakaasia ifwoyo okhuba indahi singa esitambaya siokhumurwe kukwo khandi singa ebiuma biomwikosi mumwo bing'onianga likondolio.

¹⁰Omwana wanje, abakholi betsimbi nibaba nibakhubera, oralonda amang'ana kabwe tawe.

¹¹Nibaba nibakhubool'la mbu, “Hamba khutsie n'nawe, khwekonekhele omundu ma khumwire! Chenda khuseere omundu obula esikha khulwo okhwesangasia!

¹²Chenda khubamile bumila singa emakombe nibasili abalamu, khandi nibachiman'ne, singa abandu yabo abeekhanga mubuko bwesilindwa.

¹³Khulanyoola emianduchiosi echiobukusi obutinyu, nikhwitsusia mutsinyumba tsiefwe ebindu biakhuyaakile.

¹⁴Hamba weyonge mwifwe ma fwesi khukabane ebindu biakhwibile.”

¹⁵Omwana wanje, orachenda halala nabandu singa yabo tawe. Obe ehale okhurula khubo.

¹⁶Sibasisil'langa okhukhola obubi tawe. Batetekhananga okhutsia okhwira.

¹⁷Nakabutswa okhureka oluchiikha olwe linyonyi elia wenyanga okhuhamba lilolanga;

¹⁸ne abandu singa yabo beerechekhelanga omubero abene, omubero okwa nakubeere abene.

¹⁹Obunuuli buli khasotso bwiranga omundu omunuuli; yaka niko akekholanga khumundu wosi omenyanga khulwobunuuli.

²⁰Hulile! Obuchesi bulanjilisianga namayoosi amakali mumihanda nende mubiiro,

²¹bulanjilisianga butinyu khubilibwa bielitookho nende habundu hosi aha abandu bebunjikhanga halala ne buboolanga amang'ana kano mbu:

²²Inywe abahingwa, namutsilil'le okhuba abasilu okhwola lina? Nenywe abokhuchaayilisia namutsilil'le okhuyanza okhuchaayilisia obumanyi okhwola lina? Mbula mwakhanyoolekhwo amachesi noho?

²³Muhuyie olwa nzia okhumukondokhela. Nzia okhumuhelesia amachetsiyio kanje, amalahi nisanga n'nenywe obumanyi bwanje.

²⁴Mulanganga nimusima mwitse khu ise nebutswa musuuye. Kata siyaliho omundu orekisiekhwo esirwi khu ise tawe.

²⁵Nebutswa muchaayile amebaalo kanje kosi, nimusuula okhuhulila amachetsiyio kanje.

²⁶Khulwako nase namutsekhe olwa namunyoole amanyakhano. Namukhol'lekhwo esihenyehenye olwe biriisia nabimwitsile,

²⁷yee namutsekhe olwe biriisio nabimwitsile singa ikhumaatsi[1] khandi amanyakhano nakamwitsile singa imbumbuyeka, ma namube mubutinyu nende mubusaalili obukali.

²⁸Nilwo olwa namulange obuchesi ne nase sinamukalusie tawe. Mulateema okhuuruna nesinani habundu hosi nebutswa simulanyoola tawe,

²⁹sichila mwali okhuchaya obumanyi nimusuula okhumbul'la ise OMWAMI.

³⁰Simwarunakhwo okhuhulila obwibaali bwanje tawe; mwali okhuchaya okhuchetsihia khwanje khwosi.

³¹Khulwe yako mulahebwa esiamukwana okhunyoola ne ebikhole bienywe abene bilachila mulwale.

³²Abandu abasilu bafwitsanga sichila basuulanga obuchesi. Abahingwa bamumwanga khulwokhubula okhumanyilisia.

³³Nebutswa uyo wosi owakhambulila alamenya mumulembe. Alaba mubulindi obulahi nararia amabi tawe.