Read lunyore TSINJELO 10 Bible Online

TSINJELO 10 - lunyore bible

TSINJELO 10

¹Tsino netsingano tsia Solomoni: Omwana omuchesi asangasianga samwana, ne omuhingwa abelesianga nyina.

²Obuhinda obunyool'lwanga munjila tsirali etsiahabwene bubula obukhonyi; ne obusubilwa buhonianga omundu mukhufwa.

³OMWAMI sialalekha omulunji abe neinzala tawe; nebutswa yekal'langa ababi okhunyoola akabekombanga.

⁴Obukara buleranga obutakha, nebutswa obutiyi obutinyu bulakhuler'ra obuhinda.

⁵Omwana omuchesi abunjelesianga ebiraakwa mwichesa, ne okonanga tsindoolo mumatukhu kelichesa, aleeranga es'simba murwe.

⁶Omundu omulahi anyoolanga tsikhabi. Amang'ana komundu mubi kabisanga lirimalie.

⁷Abandu abalahi betsul'lwanga khasotso singa abeikhabi, nebutswa abandu babi bebil'lwanga bwangu.

⁸Omundu omuchesi abikhanga amalako mumwoyo kukwe, ne oul'lomanga amang'ana koluhingwa anyoolanga esibeela.

⁹Omulunji amenyanga mumulembe; nebutswa owetsinjilatsie tsili tsisiamu alamanyikhana.

¹⁰Okhubehelesia khuleranga amatinyu, ne oukondekhanga habulafu aleeranga omulembe.

¹¹Amang'ana komulunji nesitaho siobulamu; ne obul'lomi bwomubi bubisanga induli.

¹²Lirima lileranga obusoolo; ne obuyanzi bufuunikhanga obwoni bwosi.

¹³Obuchesi bunyolekhanga mumunwakwe uyo oli nokhumanyilisia; ne olusaala luliho khulwa okhunywekha amabeka komuhingwa.

¹⁴Abachesi babiikhanga obumanyi, ne omunwa kwomuhingwa kuleranga obusalilu ahembi.

¹⁵Emiandu chisoolanga abahinda, ne obutakha busalisianga abatakha.

¹⁶Esihanwa siokhukhola obulahi nokhunyoola obulamu, omurungo kwobubi nokhumalila obubi.

¹⁷Abandu bahuyianga khumebaalo olwa bakol'losibwanga balamenya, ne yabo abarahuchil'langa amabi kabwe bali musibi.

¹⁸Obisanga obusuku bubwe nomubehi; khandi ouboolanga akobuchiikhi nomuhingwa.

¹⁹Okhul'loma amang'ana amenji, khukhuretsanga mubusiamu bwangu, abachesi babunanga tsi.

²⁰Amang'ana komulunji kafwana singa efetsa isiyikhu; amang'ana komundu omubi kabula obukhonyi.

²¹Amechesio kabalunji kakhonyanga abenji, ne abasilu bafwitsanga khulwa okhubula obuchesi.

²²Tsikhabi tsio MWAMI tsileranga obuhinda, ne OMWAMI siametangakhwo amanyakhano khubwo tawe.

²³Nobuhingwa okhuyanzisibwa mukhukholanga amabi abandu abachesi bayanzisibwanga namang'ana kobulwenyukhu.

²⁴Ababi banyoolanga akabaritsanga okhusila, nebutswa abalunji balahebwa akabenyanga.

²⁵Imbumbuyeka niyitsa, epulusianga ababi okhuhila ehale, ne abalunji baralila khulweinziayo.

²⁶Orahuchil'la omukara okhukhutiyila omulimo tawe; alakhusalisia singa ebarafu esalisianga ameno, nohomba singa omwosi kutsunanga mumoni.

²⁷Nomuria OMWAMI olamenya amatukhu amenji. Ababi bafwitsanga emihika chiabwe nichiroola.

²⁸Obunaayi bwabalunji bulakwa obusangali, ne ababi balindil'langa okhutiba.

²⁹Injila yo MWAMI nobwilukhilo khubalunji; ne nobwononekhu khubakholi betsimbi.

³⁰Abandu abalunji balasoolwa; ne ababi sibalamenya musibala tawe.

³¹Mumunwa mwomulunji murulangamwo obuchesi; ne ol'limi lwobufukuli lularandulanibwa.

³²Omunwa kwomulunji kumanyile aka kawanile; ne omunwa kwomubi kul'lomanga akobufukuli konyene.