Read lunyore TSINJELO 11 Bible Online

TSINJELO 11 - lunyore bible

TSINJELO 11

¹Abandu barumikhilanga esichelo siobukaati nes'sinyo khu MWAMI; ne esichelo siahabwene nisio esiayanzanga.

²Abandu besunga balanguha okhusimbibwa omurwe, ne abehili bakalaha bali nobuchesi.

³Obusubilwa bulemel'la abakol'lokhu; ne obusiamu bwabasiemani bulabamulula.

⁴Obuhinda sibunyala okhukhuhabina olwokhufwa khukhwitsilanga tawe, nebutswa obusubilwa bunyala okhuhonia obulamubwo.

⁵Obulunji bwomundu obula esikha bulakaasia obulamubwe; ne ababi balakwa khulwobubi bwabwe abene.

⁶Obulunji bwabakol'lokhu bulabahonia; ne abaranyala okhusubilwa bahambwanga mumubero kwobwekombi bwabwe abene.

⁷Olwabandu babi bafwitsanga, obunaayi bwabwe bufwitsanga halala n'nabo; obwekombi bwabwe bwomusibala bukoranga.

⁸Abalunji basoolwanga mumanyakhano, nebutswa abandu ababi benjilanga muko.

⁹Omundu anyala okhubiha khulwamang'ana kabandu babi, nebutswa obuchesi bwabalunji bunyala okhukhuhonia.

¹⁰Litaala lisangalanga olwa balunji banyoolanga tsikhabi, ne olwa babi bafwitsanga ne libetsanga neliyoka liobusangali.

¹¹Litookho limetekhanga mubukhongo olwa balunji balilaamilanga tsikhabi, nebutswa limumwanga khulwamang'ana kababi.

¹²Ochaayanga owasie abula obuchesi; ne omundu wokhumanyilisia abunanga tsi.

¹³Ouyeyema nal'loma amang'ana abisulanga amabiso; nebutswa omundu omusubilwa abisanga ling'ana.

¹⁴Aha amebaalo karali, abandu bakwitsanga; ne mubwibaali obwinji obuhonia bulimwo.

¹⁵Osingilanga omurende esisingo alasalila; ne osuulanga esisingo salasalila tawe.

¹⁶Omukhaye omukoosi anyoolanga oluyali, nebutswa abasaatsa ababi banyoolanga obuhinda bwonyene.

¹⁷Omundu wetsimbabasi yekholelanga obulahi. Ne obula tsimbabasi yesalisianga omwene.

¹⁸Abandu ababi sibulaho esiabanyoolanga singa omurungo, nebutswa uyo okholanga amalahi anyoolanga amatani.

¹⁹Omundu omulunji anyoolanga obulamu, ne olondananga nobubi anyoolanga okhufwa.

²⁰Abemioyo emibi nabes'sinyo khu MWAMI; nebutswa yabo abakholanga akahabwene bamuyanzisianga.

²¹Omanye siahene mbu ababi okhwola banyoole esinyasio, nebutswa abalunji balahonokokha.

²²Likondo lilahi liomukhasi omuhingwa, lifwana ingaka yetsahabu mumolu keimbitsi.

²³Akabalunji benyanga namalahi konyene; nebutswa ababi bana yanga okhubuusia oburima.

²⁴Abandu bandi basalanianga amapesa kabwe, nebutswa bameetekhanga okhuba abahinda; ne abandi bemananga khubiabakwanile okhuhaana, ne kata mbwo kabaler'ranga obutakha.

²⁵Haana namakhono amasiro, nawe olahindihala nemiandu; okhonye abasio, nawe nokhonywe.

²⁶Obisanga obuswache nalindil'la obukusi okhuniina, abandu balamulaama esilaamo siobubi; neikhabi elaba khu uyo obukusianga.

²⁷Orunanga obulahi nesinani alanyoola oluyali; nebutswa orunilisianga obubi, nibwo obwa anyoolanga.

²⁸Osubilanga mubuhindabwe alakwa; ne abalunji balatendema singa lisafu elineranga.

²⁹Onyasianga abeinyumbaye, sialanyoola omukabwa kwosi tawe; ne omusilu alaba omurumikhili we uyo oli nobuchesi.

³⁰Obulunji buleeranga obulamu, nebutswa indiri eleranga okhufwa.

³¹Abalunji nibaba nibarungwa musibala, kho okhwola ababi nende abakholi betsimbi banyoole esinyasio esikali okhusila.