Read lunyore TSINJELO 13 Bible Online

TSINJELO 13 - lunyore bible

TSINJELO 13

¹Omwana omuchesi ahuchil'langa okhukol'losibwa na samwana, nebutswa owomurwe mukali asuulanga okhukol'losibwa.

²Omundu omulunji alanyoola amalahi khulwamang'ana kababoolanga nebutswa abakaati beekombanga obulwani.

³Ohenge obwonyala okhul'loma ma olinde obulamubwo; ne owerobotsanga alakora koro.

⁴Omukara yekombanga ne sianyoolanga esindu tawe; ne omutiyi owesinani alanyoola ebindu biosi ebia yenya.

⁵Omulunji abihil'lwanga obubehi; nebutswa amang'ana komubi kaleeranga es'simba murwe nende tsisoni.

⁶Obulunji busoolanga abarali nesikha; ne obubi bukwisianga abetsimbi.

⁷Abandu bandi bekholanga abahinda nebutswa babula esindu. Abandi bekholanga abatakha nebutswa bali nobuhinda obwinji.

⁸Omundu omuhinda anyala okhurumikhila amapesake okhusoola obulamubwe; nebutswa omutakha abulakhwo injila yokhwesoola.

⁹Abalunji bali singa etaya eyakhanga obulafu obukali, nebutswa ababi bali singa etaya emulamulanga.

¹⁰Injinia eleranga amanyakhano konyene; ne abachesi bahuchil'langa okhwibaal'lwa.

¹¹Obuhinda obunyoolwanga munjila inyangu bulanguha okhuhwa, ne uyo obunjelesianga mubutinyu alahindila n'nabwo.

¹²Esinaaywanga nisirekhola bwangu, silwasianga omwoyo; ne esinaaywanga olwa sinyoolekhanga, sileranga obusangali mubulamu.

¹³Oba nachayanga obwibaali yeler'ranga amanyakhano, ne oulondanga amalako alanyoola amatani.

¹⁴Amebaalo komuchesi nesitaho siobulamu; kalakhuhonokosia olwoba noli musibi.

¹⁵Obuchesi buleranga oluyali, nebutswa yabo, abaranyala okhusubilwa bali khunjila yokhutiba.

¹⁶Abandu bobuchesi bapaalanga kho bakhole ling'ana; ne injila yabasiemani neyokhukora.

¹⁷Abarumwa ababi baleeranga amanyakhano, ne abarumwa abasubilwa baleeranga omulembe.

¹⁸Obutakha nende es'simba murwe bilaba khu uyo osuulanga okhwibaal'lwa; ne uyo ohulilanga amachetsiyio alanyoola oluyali.

¹⁹Akekombwanga nikekhol'le namalahi khumundu. Abandu ababi basuulanga okhwehanya obubi.

²⁰Nochenda nabachesi, nawe olaba omuchesi, ne nochenda nabahingwa nawe olaba musibi.

²¹Amanyakhano kalondanga abetsimbi hosi aha batsitsanga, nebutswa abalunji balakabul'lwa ebindu ebilahi.

²²Abandu abalahi balekhelanga abetsukhulu babwe emiandu, ne obuhinda bwabakholi betsimbi bubikhilwanga abalunji.

²³Omukunda kwomutakha okwakonela kunyala okhwama ebiokhulia ebinji, ne binyala okhukora khulwa obukhalachi obubi.

²⁴Noba noratiaba omwanawo khulwokhumuchetsiyia kho siwamuyanza tawe. Ne nomuyanzanga okhwola omukol'losie.

²⁵Abalunji balitsanga nibekura; nebutswa ababi babetsanga neinzala khasotso.