Read lunyore TSINJELO 14 Bible Online

TSINJELO 14 - lunyore bible

TSINJELO 14

¹Tsingo tsiombokhwanga khulwobuchesi bwabakhasi, nebutswa chisambulwanga khulwobusilu bwabwe.

²Ochendanga mubulunjibwe aheelesianga OMWAMI oluyali; ne owoburabatsanu munjilatsie amuchaayanga.

³Obweloli bwomuhingwa buchilanga al'lome amang'ana amenji; amang'ana komundu omuchesi kamusoolanga.

⁴Ahetsing'ombe tsiokhulima tsirali, obuswache sibubetsangaho obwinji tawe, ne aha tsili, obuswache bubetsangaho obwinji.

⁵Omukobokheli omusubilwa siabeyanga tawe, ne omukobokheli orali omusubilwa aboolanga ob'behi bwonyene.

⁶Abandu abeloli sibanyala khuba abachesi tawe; nebutswa abachesi bamanyilisianga bwangu.

⁷Orekhala nabandu abahingwa tawe; babula eliabanyala okhukhwekesia.

⁸Omundu omulwenyukhu ali nobuchesi bwokhumanyilisia ahatsitsanga, ne obusilu bwabahingwa bubakosianga.

⁹Abandu abahingwa sibahendakhwo niboona tawe, nebutswa abandu abalahi bareeba okhulekhelwa.

¹⁰Omundu amanyilisianga obutsune bubwe omwene, kata obusangalibwe omucheni sanyala okhusanga mubwo tawe.

¹¹Inyumba yomubi elasambulwa, nebutswa obumenyo bwomulunji bulahindila.

¹²Injila elolekhanga khumundu mbu neinunji enyala okhukhukhwosia mulufu.

¹³Kata mukhutsekha, omwoyo kunyala khuba nikutsunungwa, khandi obusangali bunyala okhukwa esibeela.

¹⁴Abandu ababi balanyoola omukabwa kwobubi bwabwe. Abandu abalahi balanyoola omukabwa kwamalahi kabwe.

¹⁵Omundu orali nobuchesi asubilanga buli ling'ana; ne omuchesi ahenjelesianga singa obwachenda.

¹⁶Omundu omuchesi yetembelesianga alekhe okhweinjisia mumanyakhano, nebutswa omuhingwa siahendelanga tawe makwa mumanyakhano.

¹⁷Omundu welirima akholanga ebindu biobuhingwa, ne omundu omuchesi yesimilisianga.

¹⁸Abandu baramanyilisianga banyoolanga ebiobuhingwa bwabwe, nebutswa abachesi banyoolanga omukabwa kwokhumanyilisia.

¹⁹Ababi balasikamila abalunji; khandi balabahomba obukhonyi.

²⁰Abatakha sibayanzwanga nende abatakha basiabwe tawe; nebutswa abahinda bali nabalina abenji.

²¹Ochaayanga oweinzala akholanga abubi; nebutswa nabetsikhabi abali netsimbabasi khubatakha.

²²Olanyoola oluyali nende okhusubilwa noba nokhola amalahi, noba norechekha okhukhola amabi, sioba nokholanga obulahi tawe.

²³Mukhutitikhana khumilimo khulimwo obukhala, okhul'loma okhwinji niwikhaye khuleranga obutakha bwonyene.

²⁴Olusimbi lwabachesi nobuhinda bwabwe, ne abahingwa bamanyikhanga khulwobusilu bwabwe.

²⁵Omukobokheli watooto ahonianga obulamu. Owononianga amera kabandu aboolanga butswa obubehi.

²⁶Omundu ohelesinjia OMWAMI oluyali aleranga olutswoni nende omulembe khuye nende khubeinyumbaye.

²⁷Okhuhelesia OMWAMI oluyali nesitaho siobulamu, mbu omundu ahonokokhe okhurula khumareko kokhufwa.

²⁸Oluyali lwomuruchi luli mubwinji bwabandube; ne sila abandu abula oluyali.

²⁹Omundu wokhwesimilisia ali nobumanyilisi obwinji. Nebutswa owelirima liabwangu amanyianga obuhingwa obukali.

³⁰Omulembe mumwoyo kuleranga obulamu khumubili, ne imbalikha efwana obulwaye buli mumakumba.

³¹Okhupianga abatakha esibi anyekanga Nyasaye owabalonga, ne omuhaani khubatakha ahelesianga Nyasaye oluyali.

³²Omundu omubi yekwisianga hasi namang'ana kaake amabi, nebutswa omulunji anyoolanga obulindi musilongolesie.

³³Obuchesi bumenyanga mumwoyokwe uyo oli nokhumanyilisia, nebutswa abahingwa sibamanyilisianga obuchesi tawe.

³⁴Obulunji bukholanga abandu okhuba abakhongo, ne okhukhola tsimbi khuleranga es'simba murwe khwihanga.

³⁵Abaruchi bayanzisibwanga nabakholi besinani, nebutswa bahaananga esinyasio khuyabo abakholanga akobusilu.