Read lunyore TSINJELO 15 Bible Online

TSINJELO 15 - lunyore bible

TSINJELO 15

¹Likalusio lilahi lisimiang'a lirima, ne ling'ana lilulu lichemanga oburindi.

²Olwabachesi bal'lomanga, barumikhilanga obumanyi habwene; nebutswa olwa abahingwa bal'lomanga, basundulanga obuhingwa.

³OMWAMI alolanga kosi akekholekhanga habundu hosi, ne akhuhenganga nikhuba nikhukhola amabi nende amalahi.

⁴Amang'ana kemilembe kaleeranga obulamu, nebutswa amalulu kaminanga omwoyo.

⁵Omuhingwa achaayanga amebaalo kabasamwana; ne uyo ohulilanga amachetsiyio nomuchesi.

⁶Abalunji babiikhanga emiandu chiabwe bulahi, nebutswa ababi bachikosianga olwa banyoolanga amanyakhano.

⁷Abandu abachesi bal'lomanga amang'ana obumanyi; abahingwa sibakhol'langa mbwo tawe.

⁸Omusango kwomubi nes'sinyo khu MWAMI; nebutswa oyanzisibwanga nokhusaaya khwabandu abalahi.

⁹Tsinjila tsiabandu ababi nes'sinyo khu MWAMI; nebutswa ayanzanga abandu abakholanga amalunji.

¹⁰Noba nolekha injila inunji olahebwa esinyasio esilulu, ne noba nosuula okhukol'losibwa olafwa.

¹¹Kata esibala sie Makombe sisinyala okhwikal'la OMWAMI okhumanya akalimwo tawe; Kho abandu bakhabisa mbwena amapaalo kabwe khu Nyasaye?

¹²Abeinjinia sibayanzanga okhuchetsihibwa tawe; sibareebanga obwibaali okhurula khubachesi tawe.

¹³Olwabandu babetsanga nibayanzile, basangalanga hamoni, nebutswa olwa babeelelanga bakhunyianga hamoni.

¹⁴Abandu bobuchesi barunanga okhweka, nebutswa abahingwa bekuranga khulwamang'ana kobusilu.

¹⁵Amatukhu kosi akabamanani nakokhukhupa esibi, nebutswa abandu bobusangali behulilanga bulahi.

¹⁶Nobukhala okhuba omutakha ma ohelesie OMWAMI oluyali, okhuyomba okhuba nobuhinda obwinji ma obe namanyakhano.

¹⁷Nobukhala okhulia tsifwa nabandu abawayanzana n'nabo, okhuyomba okhulia inyama inolu ahobusoolo buli.

¹⁸Abandu belirima babusianga obusoolo; nebutswa abesimilisi baleeranga omulembe.

¹⁹Noba omukara ne niwakaana neminyakhano hosi ahotsia, nebutswa noba omusubilifu solaba neminyakhano tawe.

²⁰Abaana abachesi basangasianga abasamwana; nebutswa abahingwa bachiayanga abanyina.

²¹Abahingwa basangal'langa obusilu bwabwe; nebutswa abali nokhumanyilisia bakholanga akahabwene.

²²Ahobwibaali burali, amang'ana kononekhanga, nebutswa ahabachetsiyi abenji bali katsilil'langa bulahi.

²³Okhuhaana likalusio lilahi munyinga ekhoyele kasangasinjia buli mundu.

²⁴Abandu abachesi bachendanga khunjila eyanikilanga netsia mubulamu, ne tawe khunjila ekongomanga netsia Emakombe.

²⁵OMWAMI yakhasambe tsinyumba tsiabandu beinjinia, nebutswa yakhasoole emianduchiomukhasi omulekhwa.

²⁶Amarechekho amabi nes'sinyo khu MWAMI; nebutswa asangal'langa amang'ana amalahi.

²⁷Olangukhilanga obukhala aleer'ranga inyumba yiye esibi, nebutswa uyo osuulanga ebihetso alaba mwoyo.

²⁸Abandu abalahi bapaalanga nibasili okhukalusia amang'ana, abandu babi bahaananga likalusio liabwangu ma kaleera amanyakhano.

²⁹Olwabandu abalahi basaayanga, OMWAMI abahulilanga, nebutswa siahuyianga khukababi tawe.

³⁰Obumwemwendi obwomumoni busangasinjia omwoyo. Ne amang'ana amalahi kameetanga obukhala mumakumba.

³¹Noba noreka esirwi olwa wibaal'lwanga, olaba omuchesi.

³²Uyo osuulanga amebaalo yesaalisinjia omwene; ne ohulilanga amachetsiyio anyoolanga obuchesi obwinji.

³³Okhuhelesia OMWAMI oluyali nibwo obwobuchesi, ne okhwetutuyia khulakhuleer'ra oluyali.