Read lunyore TSINJELO 16 Bible Online

TSINJELO 16 - lunyore bible

TSINJELO 16

¹Nyasaye niye ochilanga amang'ana nikekholekha, khunyala okhuloosia amang'ana, nebutswa Nyasaye niye ochilanga nikekholekha.

²Omundu anyala okhupaala mbu kosi aka akholanga namalahi, nebutswa OMWAMI achelanga akali mumwoyo.

³Ore khu MWAMI emilimochio, ne kosi akochoomanga okhukhola kalahesibwa.

⁴OMWAMI yalomba bulisindu khulwa esifune siasio siene, yee, kata ababi yabalomba okhwola khunyinga yesinyasio.

⁵Buli mundu okhola esunga mumwoyo nes'sinyo khu MWAMI, kata amakhono nikatilana mbwena sialabula okhunyoola esinyasio tawe.

⁶Tsimbi tsilekhelwanga khulwokhuyanza Nyasaye nende okhuba nobusubili muye; ne khulwo khuhelesia OMWAMI oluyali abandu behanyanga tsimbi.

⁷Olwomundu ayanzisianga OMWAMI, achilanga kata abasukube bamenye n'naye mumulembe.

⁸Nobulahi okhunyoola bitititi munjila indahi, okhuyomba okhunyoola ebinji munjila yobusiamu.

⁹Omundu anyala khuloosia akoluchendo lulwe nobuchesibwe, nebutswa OMWAMI niye omwibaalanga obwachendakhwo.

¹⁰Omuruchi al'lomanga nobunyali bwesinyasaye, obukhalachi bubwe bubetsanga habwene.

¹¹OMWAMI yenyanga ebipichelo nende etsiratili okhuba etsiahabwene, kata amachina komitata kokhuchela.

¹²Abaruchi sibahuchil'langa amabi tawe, sichila obwatooto nibwo obukholanga indebe yobwami okhuralila.

¹³Obul'lomi bwakatooto nibwo obuyanzisianga abaruchi; nabo bayanzanga uyo oboolanga habwene.

¹⁴Omuruchi naba nahambwa nelirima omundu anyala okhufwa, ne omundu omuchesi ateemanga okhuyanzisia omuruchi.

¹⁵Esirenda siomuruchi sifwana singa amalumbesi akaleeranga ifula murotso, ne obulamu bulimwo.

¹⁶Nabulahi okhusila okhunyoola obuchesi nende obumanyi, okhuyomba okhunyoola etsahabu nende efetsa.

¹⁷Injila yomulunji yikal'langa amabi; uyo ohenganga okhuchendakhwe alahonia obulamubwe.

¹⁸Esunga ekhuler'ranga okhumululwa, ne omwekhonyo kuchilanga okwe hasi.

¹⁹Nobulahi okhuba nende omwoyo omwetutuyi halala nabamanani, okhuyomba okhukabulana ebiobunuli nende abesunga.

²⁰Owengelesianga akayekibwanga alanyoola amalahi, nebutswa noweikhabi oretsanga obusubilibwe mu MWAMI.

²¹Omundu omuchesi, owakhula wamanyikha khulwobumanyibwe. Ne obul'lomi obulahi buhombelesianga abandu.

²²Obuchesi nesitaho siobulamu khu uyo oli n'nabwo, nebutswa okhuteema okhwibaal'la abahingwa kabula obukhala.

²³Omundu omuchesi apaalanga nasili okhul'loma, ne akababoolanga kahombelesianga abandu.

²⁴Amang'ana amalahi kali singa okhuronyel'la khwobuukhi; namelungu mumunwa, khandi nobulamu khumubili.

²⁵Injila elolekhanga khumundu mbu neinunji enyala khukhwosia mulufu.

²⁶Noba neinzala okhwola otiye butinyu okhunyoola esiolia.

²⁷Abandu ababi barunanga tsinjila tsiokhusaalisia abasiabwe; kafwana singa ol'limi lulwe lulikhwo omul'lo kusambanga.

²⁸Amamonyi kalandibwanga nabandu babi; bachemelesianga amang'ana ma beera obulina.

²⁹Omundu owayanza obusoolo akatilisianga abasie, ma abenjisia mumang'ana amabi.

³⁰Obe meso khubandu bakhumwenyelanga nende okhumwata tsimoni, babetsanga nibali neinganakani imbi.

³¹Tsimbutsi nolusimbi lwoluyali, okhuba tsinyoolekhanga mukhukhola amalunji.

³²Nobulahi okhubula khuhambwa nelileko bwangu okhuyomba okhuba omulwani. Nobulahi okhwikal'la lirima okhuyomba okhuleka amatookho amakali.

³³Abandu bakhupanga imbulu khulwokhweka obulalilo bwa Nyasaye, nebutswa Nyasaye mwene niye ohaananga obukhalachi bwokhumal'likha.