Read lunyore TSINJELO 17 Bible Online

TSINJELO 17 - lunyore bible

TSINJELO 17

¹Nobulahi okhulia amalondo noli nomulembe mumwoyo, okhuyomba okhuba nelisabo munyumba yobulembani.

²Omurumikhili omuchesi alaba nobunyali khumwana omuhingwa wo Mwamiwe, ne alahebwa khubulaame bwo Mwami.

³Efetsa nende etsahabu bitemelwanga mumul'lo nibisiiywa, ne omwoyo kwomundu kuteemwanga nende OMWAMI.

⁴Abandu ababi bahuyianga amebaalo amabi, ne ababehi nabo barekanga amarwi khubul'lomi bwokhwononia.

⁵Noba notsekhel'la omutakha oba nonyekanga Nyasaye owamulomba; ne osangal'langa amabi aketselanga owasie sialabula okhunyoola esinyasio tawe.

⁶Abeetsukhulu babetsanga olusimbi lwabasakhulu; abaana banyoolanga oluyali khulwa bebuli babwe.

⁷Abandu boluyali sibaboolanga obubehi tawe, ne abahingwa sibali namang'ana amalahi akabanyala okhuboola tawe.

⁸Abandi bapaalanga mbu ebihetso bifwananga inyuma yobukusi obutinyu, basubilanga mbu binyala okhukhola ling'ana liosi okhukaasa.

⁹Uyo olekhelanga abasie amabi arunanga obuyanzi. Uyo owitsul'langa amang'ana mabi akosianga abalina abatinyu.

¹⁰Omundu oli nobuchesi anyoolanga elieko likali okhurulana nende lichetsiyio elala, okhuyomba akomuhingwa yakheeka kata naba natiaba tsikhoba emia ndala.

¹¹Abandu ababi benyanga induli yonyene; khusifune yisi okhufwa khulabetsela singa omurumwa obula tsimbabasi.

¹²Nobukhala okhwakaana nende eliaka likhasi elinul'lwe abaana balio, okhuyomba okhwakaana nende omuhingwa mubuloosiebwe obwoluhingwa.

¹³Noba norunga obubi khubulahi, obubi sibularula munyumba yiyo tawe.

¹⁴Obusoolo buchaakanga namahangasi singa obwamaatsi kekul'lwanga olwokhuranga, khulwe yako lekha amahangasi obusoolo nibusili okhuchaaka tawe.

¹⁵Omundu okobokhelanga omundu omusiamu mbu nomulunji, khandi uyo owir'ranga omulunji esiina, yabo bombi bali es'sinyo khu MWAMI.

¹⁶Kabula esifune omuhingwa okhumal'la amapesa mumasomo, sichila siali nende oburechelefu tawe.

¹⁷Omulina ayanzanga amatukhu kosi, ne omwana wenywe aliho khulwokhukhonyel'la mumanyakhano.

¹⁸Omundu obula oburechelefu abukulanga amakobi kowasie nakakhola akake.

¹⁹Okhuyanza tsimbi kafwana nende okhuyanza obusoolo. Noba niwepaaka khase nakhase werun'nanga esibi.

²⁰Omundu womwoyo omubi sianyoolanga obulahi bwosi tawe, ne ol'lomanga amang'ana amabi akwitsanga mumarabba.

²¹Omundu weebula omuhingwa anyoolanga esibeela; ne samwana omusilu siali nobusangali tawe.

²²Omwoyo omusangalu kuli singa indesi indahi, ne omwoyo okwesikokele kuhangalasianga amakumba.

²³Abakhalachi ababi babukulanga ebihetso masilisi, ma basiamia tsinjila tsiobukhalachi.

²⁴Omundu omuchesi achoomanga okhukhola amalunji, nebutswa ahenganga mutsimbeka tsinyinji.

²⁵Abaana abahingwa nesibeela khubasamwana, khandi nobululu khubanyina.

²⁶Sibuli obulahi okhukhalachila abalunji omurungo kwesiina tawe; obukhalachi bwahabwene busiamibwanga olwabandu abalahi bahebwanga esinyasio.

²⁷Yabo abamanyile esiabakholanga sibal'lomanga tsinyinga tsiosi tawe. Abandu ababunanga tsi bali nobuchesi.

²⁸Kata omuhingwa, olwa asiling'ananga alolekhanga singa omuchesi. Khandi olwa yekalanga omunwakwe, apaalungwa mbu ali nobumanyilisi.