Read lunyore TSINJELO 18 Bible Online

TSINJELO 18 - lunyore bible

TSINJELO 18

¹Oweyahulanga khubasie yenyanga obwekombi bubwe omwene; ne siahuchilisanianga nende akabandu bosi balolanga okhuba akahabwene tawe.

²Omuhingwa siasangal'langa obumanyilisi tawe, habula yenyanga alolekhe singa omuchesi.

³Olwa abubi bwitsanga, okhuchaaya nakhwo khwitsanga, okhukosia oluyali khwitsanga nende es'simba murwe.

⁴Amang'ana komunwa kwomundu kali singa esitaho siobuchesi sili singa amaatsi katsia olutungu.

⁵Sibuli obulahi okhukobokhela akomubi; okhubula okhuhaana obukhalachi bwahabwene khumulunji.

⁶Olwa omuhingwa al'lomanga, ne obusoolo buchaaka; amang'ana kaake kaleeranga obukhupani.

⁷Ol'limi lwomundu omuhingwa nilwo olumwononianga omwene, ne omunwakwe kumuretsanga mumanyakhano.

⁸Amang'ana komutsanzani kayelunga singa ebiokhulia ebinolu, kenjil'langa ekali munda munsi.

⁹Omutiyi omukara no mwana wanga omundu owayanza okhwononia ebindu.

¹⁰Eliira lio MWAMI nomunaara kwetsingufu; omulunji yelukhilangamwo ma aba nomulembe.

¹¹Abandu abahinda bapaalanga mbu emiandu chiabwe chili singa litaala liasirwa butinyu khandi oluhinga olurambi.

¹²Omunyakhano nikusili okhubaho omundu yelolanga; okhwola omundu yetutuyie naranyoola oluyali.

¹³Omundu uyo okalusianga ling'ana nasili okhulihulila, kabetsanga obuhingwa nende es'simba murwe khuye.

¹⁴Omwoyo kwomundu omusangalu kunyala okhuchila amenye olwali mubulwayebwe; nebutswa nikuba nikufwa, sianyala okhuba mwoyo tawe.

¹⁵Obuchesi bwitsanga khumundu omanyilisianga, ne esirwi siomundu omuchesi sihuyianga okhunyoola amachesi.

¹⁶Esihanwa sikulanga omuliango khu ohaananga, ne simusundanga imbeli wabandu abakhongo.

¹⁷Omundu oranjil'la okhuboola ebifunebie musiina alolekhanga singa omulunji; okhwola olwo oundi yetsanga okhureeba amareebo.

¹⁸Imbulu esimianga amahingane, khandi yabukhania abetsingufu.

¹⁹Okhonye omusiani wenywe naye alakhusoola singa litookho eliasirwa butinyu, nebutswa noba nosoolana n'naye alakhwikal'la ebiliango.

²⁰Omundu yekuranga ebiamo biomunwakwe; ol'limi lulwe lulamuha ebiokhwekhonyela.

²¹Ol'limi luli nobunyali bwobulamu nende okhufwa; olombe obulina n'nalwo ne olasangala.

²²Omundu onyoola omukhasi anyoola esindu esilahi; nanyoola okhukosibwa nende OMWAMI.

²³Omutakha arumikhilanga okhusaaya; ne omuhinda ahaananga likalusio lilulu.

²⁴Baliho abalina abarunanga butswa akolubutso; ne aliho omulina onyala okhuba ahembi n'nawe okhuyomba omwana wenywe.