Read lunyore TSINJELO 19 Bible Online

TSINJELO 19 - lunyore bible

TSINJELO 19

¹Omutakha ouchendanga musilongolesie nomulahi, okhuyomba omuhingwa owetsula nobukaati.

²Okhuba nesinani sila obumanyilisi sibuli obulahi tawe; okhubula okhwesimilisia khulachila okwe musibi.

³Abandu bandi beyononianga abene khulwamang'ana kabwe akobusilu ma bachaaka okhutula OMWAMI.

⁴Abandu abahinda bameetanga okhunyoola abalina abenji; nebutswa abatakha abalina babelukhanga.

⁵Noba nohaana obukobokheli bwobubehi musiina okhwola ohebwa esinyasio ne wosi oboolanga obubehi sialahona tawe.

⁶Abenji balasaaya omundu omukhongo abahenge oluboni; ne buli mundu yekholanga omulina weyabo abahaananga ebihanwa.

⁷Abekho bosi abomutakha bamusuulanga; nisio esichilanga abalinabe nibelukha okhurula khuye. Kata naba nateema butinyu okhubakalusia, sikanyalikha tawe.

⁸Wekhol'le obulahi omwene, ma weeke amang'ana amenji; noba niwitsul'la akaweekele olahindihala.

⁹Noba nohaana obukobokheli bwobubehi musiina okhwola onyoole esinyasio, ne wosi oboolanga obubehi alakora.

¹⁰Abahingwa sibakwananga okhumenya mubwale tawe, ne abasumba sibakwananga okhwamiha abandu boluyali tawe.

¹¹Noba noli nobuchesi siolahambwa nelirima bwangu tawe. Omundu naba nakhukhol'la obubi kalaba akoluyali noba nobula okhukabiikha mumwoyo.

¹²Lirima liomuruchi lili singa okhuhuma khwesimba, nebutswa obukoosiabwe buli singa okhwinjisia ifula.

¹³Omwana omuhingwa aleer'ranga samwana esibeela, omukhasi omulembani achonyianga singa ifula eronyanga munzu.

¹⁴Inyumba nende obuhinda nobulaame obwomundu anyoolanga okhurula khubebulibe, nebutswa omukhasi omuchesi arulanga khu MWAMI.

¹⁵Obukara buleranga tsindoolo tsinyinji; ne omutofu inzala elamuluma.

¹⁶Olonde amalako ka Nyasaye nawe olamenya oluhono, noba nokalekelesia olafwa bwangu.

¹⁷Noba nokhol'la omutakha aketsimbabasi omwechekhanga OMWAMI, naye OMWAMI alakhurunga khubukholibwo.

¹⁸Chetsiyia abaanabo olwa basili abatitiiti abokhweka. Norakhola mbwo, obakhonyanga okhwononia obulamu bwabwe.

¹⁹Omundu naba welileko elinji omwene yetuukhe amarabbake. Noba nomuhonia l'lala okhwola khandi omuhonie olundi.

²⁰Noba nohulila obwibaali, ne noyanza okhweka, litukhu lindi nobe omuchesi.

²¹Abandu banyala okhuloosia amang'ana amenji, nebutswa akobuloosie bwo MWAMI niko akalekholekha.

²²Akenywa mumundu netsimbabasi; ne omutakha ali nobukhala okhuyomba omubehi.

²³Ohulile OMWAMI nawe olamenya oluhono; olamenya mubwikuru sila obubi bwosi.

²⁴Abandu bandi nabakara, kata sibanyala okhura ebiokhulia mumunwa tawe.

²⁵Abeinjinia okhwola banyoole esinyasio, kho abandu abaramanyile esindu siosi banyoole elieko. Nabo noli omuchesi olanyoola elieko Olwo ochetsihibwa.

²⁶Omundu ochaayanga samwana, natabia nyinawe okhurula hango, no mwana wetsisoni oleeranga es'simba murwe.

²⁷Omwana wanje, noba nolekha okhuhulila amebaalo, alasiama butswa okhurula khumang'ana kobuchesi.

²⁸Omuloli omubi achaayanga obukhalachi; ne omunwa kwomubi kumilanga obubi.

²⁹Omundu omuhingwa khandi oweinjinia okhwola anywekhwe tsikhoba.