Read lunyore TSINJELO 2 Bible Online

TSINJELO 2 - lunyore bible

TSINJELO 2

¹Omwana wanje, fumila amang'ana kanje akakhwibaal'langa ne orebil'la amalako kanje tawe.

²Orekie amarwi kaako okhuhulila akobuchesi norakhwo omwoyo kukwo khukhumanyilisia.

³Yee, reeba onyoole obuchesi, nochingula omwoyo kukwo onyoole okhumanyisia.

⁴Oburune butinyu singa obworunanga efetsa nohomba obuhinda bwabiswa mumaloba.

⁵Niwakhakhola mbwo, wakhamanya esifune siokhuhelesia OMWAMI oluyali, nende okhunyoola okhumumanya Nyasaye.

⁶OMWAMI niye ahaananga obuchesi; mumunwa kukwe murulangamwo obumanji nende okhumanyilisia.

⁷OMWAMI ahaananga obukhonyi nende obulindi khubandu abatsienukhu khandi abalunji.

⁸Alindanga tsinjila tsiabalunji, khandi alindanga tsinjila tsiabarumikhili baabe abasubilwa.

⁹Kho nilwo olwa olimanyilisia obulunji nende obukhalachi bwatooto, ma olonde khunjila inunji.

¹⁰Okhuba obuchesi bulenjila mumakani kaako, ne obumanyi bulasangasia omwoyo kukwe.

¹¹Obulwenyukhu bulakhulinda ne okhumanyilisia khulakhulinda,

¹²nikhukhwikal'la okhukhola amabi. Khulakhuhinia khubandu yabo abaleeranga amanyakhano khulwokhuboola amang'ana akokhukosia;

¹³abandu yabo abalekhanga tsinjila tsiobulunji, mbu bachende khunjila tsiesiilima,

¹⁴abandu yabo abasangalanga okhukhola amabi, khandi abayanzanga amang'ana amabi akoluhingwa okhukosia khwetsimbii,

¹⁵abandu abakor'ra mutsinjila tsiobusiamu, abakoyanu mutsinjila tsiabwe.

¹⁶Obuchesi bulakhuhonia okhurula khumukhasi omuheyi, oteemanga khuhombelesia nende amang'ana kaake amalahi,

¹⁷orali omusubilwa khu musaatsa uwe ma yebil'la indakano eyayalomba imbeli wa Nyasaye.

¹⁸Okhuba inyumba yiye eli khunjila yokhufilakhwo, ne okhutsia ebwene yiyo oba nohengele musibala siabafwa.

¹⁹Muyabo abamwitsilanga abulakhwoho okalukhanga okhumulola khandi. Abulaho okalukhanga khutsing'anyi tsiobulamu khandi tawe.

²⁰Kho okhwola olonde mumakulu kabandu abalahi ma omenye obulamu bwobulunji.

²¹Abandu abalunji balamenya musibala, ne yabo abali abatooto balasikalamwo.

²²Nebutswa Nyasaye alahinia abandu betsimbi balehwa okhurula musibala singa ebiraakwa.