Read lunyore TSINJELO 20 Bible Online

TSINJELO 20 - lunyore bible

TSINJELO 20

¹Okhunywa amalwa amenji khuchilanga omundu okhuba omuhingwa ma akhupa liyoka liobusoolo. Uyo okanywetsanga amenji siali omuchesi tawe.

²Orie omuruchi oli nelirima singa obwonyala okhuria esimba ehuumanga; uyo omuchemanga lirima yeretsanga musibi omwene.

³Nakoluyali khumundu okhulekha obusoolo; nebutswa omuhingwa, okhwola asoolane.

⁴Omukara asuulanga okhulima mumatukhu kokhulima; khulwe yako akhaabanga ebiachesa mwichesa, nebutswa sialinyoola esindu tawe.

⁵Amapaalo komumwoyo kwomundu kali singa amaatsi akali musitaho esiayabwa hasi; ne omundu omuchesi alakataha.

⁶Abenji baboolanga nabasubilifu, nebutswa nihena ahawakhanyoola omusubilwa?

⁷Omundu niyakhamenya obulamu obulahi khandi obwesilongole, kabetsanga aketsikhabi khubaanabe abalekhele.

⁸Omuruchi yekhalanga khundebe yobukhalachi, aseletsanga obubi bwosi netsimonitsie.

⁹Niwina onyala okhuboola mbu, “Sabile omwoyo kwanje; ndi omusiyikhu khutsimbi tsianje?”

¹⁰OMWAMI abihil'lwanga abandu barumikhilanga ebichelo nende etsiratili tsirali etsiahabwene.

¹¹Omwana yemanyianga mubikholwa bibie, nikali ifwo yiye neinunji khandi ingol'lokhu.

¹²OMWAMI wakhuhelesia tsimoni tsiokhulol'la, nende ebirwi biokhuhulil'lamwo.

¹³Orayanza tsindoolo tawe, khase olaba omutakha; okhole emilimo nawe olanyoola ebiokhulia ebinji.

¹⁴Okulanga yekananga khasotso mbu obukusi buli ikulu, nebutswa natsiye yepaakanga singa anyooye obukusi obulahi.

¹⁵Nomanyile akoboolanga, oli nesindu siobukusi, okhuyomba etsahabu nohomba tsinyuma tsinzakhanyu.

¹⁶Omundu omuhingwa okhusila yesuhanga okhurunjila omundu wa aramanyile likobi, asinganga emianduchie singa esisingo khulwe likobi yilio.

¹⁷Ebiokhulia binyoolekheye mubwibi binyala okhuba ebielungu, ne olunyuma bikwa tsinzalu mumunwa.

¹⁸Ohuchil'le obwibaali, nawe olanyoola obulechi, oratsia mubulwani sila obuloosie bwosi tawe.

¹⁹Amamonyi kabisulanga amebiso, khulweyako oretsoka nende uyo owerobotsanga tawe.

²⁰Omundu wosi onyekanga samwana nohomba nyina, obulamubwe bulahwa singa etaya esimibwanga musiilima esimwamu ti.

²¹Emianduchionyoolanga matetekhana, sichilakhuler'ra tsikhabi mukhumal'likha tawe.

²²Orapaala akokhubanza es'sialia omwene tawe; osubile khu MWAMI, naye alakhuhabina.

²³OMWAMI abihil'lwanga abandu barumikhilanga ebichelo, nende etsiratili tsirali etsiahabwene.

²⁴OMWAMI wamala okhuloosia injila yefwe, kho omundu yakhamanya mbwena ahobulamubwe buhengele?

²⁵Opaale bulahi nosili okhwesuha esiokhuhaana khu MWAMI, khase olunyuma wakhabeelela khulwokhwesuha.

²⁶Omuruchi omuchesi arunilisianga okhumanya abandu babi, ma obahelesie esinyasio sila tsimbabasi.

²⁷OMWAMI akhosianga obulafu mumwoyo kwomundu narunilisia mukarimwe mwosi.

²⁸Omuruchi alatsilil'la okhuruka oluhono lwoburuchibwe bulimwo akatooto, obulunji, nende obukhalachi bwahabwene.

²⁹Oluyali lwabasiani netsingufu tsiabwe; ne eng'oono yabasakhulu nomurwe kwetsimbutsi.

³⁰Okhukhupakwa okhusaalisianga khusaabanga tsimbi, ne okhutiabwa tsikhoba khusiiyanga mukari mwene.