Read lunyore TSINJELO 21 Bible Online

TSINJELO 21 - lunyore bible

TSINJELO 21

¹OMWAMI ali nobunyali okhwemel'la omuruchi singa butswa obwa asukhanianga omuchela hosi ahayenya kutsie.

²Omundu anyala okhupaala mbu kosi aka akholanga namalahi, nebutswa OMWAMI achelanga emioyo.

³Khola akali amalahi khandi amalunji; yako kayanzisianga OMWAMI okhuyomba okhumuleer'ra emisango.

⁴Esunga nende injinia nibio ebiemel'langa ababi, ne yibio biombi netsimbi.

⁵Obuloosie bwabandu besinani bubaler'ranga emiandu eminji, ne buli mundu otetekhananga sanyoolanga ebimuhela tawe.

⁶Okhunyoola obuhinda khunjila erali inunji bwanguhanga okhuhwa, ne okhwola bukhuler're okhufwa.

⁷Obusoolo bwababi bulabakhwesa nibubahila ehale, sichila basuulanga okhukhola akali amalahi.

⁸Injila eyababi bachendangakhwo neisiamu okhusila, nebutswa emilimo chiabalunji nemilahi.

⁹Nobulahi okhumenya khunungo okhuyomba okhumenya munyumba halala nomukhasi omulembani.

¹⁰Ababi bekombanga okhukhola amabi; babula tsimbabasi khubasiabwe.

¹¹Olwomundu weinjinia anyoolanga esinyasio, uyo obula obuchesi nachetsiha. Olwomuchesi yebaal'lwanga, ne nachetsiha okhusila.

¹²Nyasaye, omutsienukhu amanyilisianga akekholanga munyumba yomundu mubi; ne alakwisia ababi mubusasikhi.

¹³Owikalanga amarwi khukhulakaya khwom'manani, naye olwa alilakaya, abulaho owakhamuhulile.

¹⁴Omundu naba nakhusinyikhila, esihanwa siamambiswi silasimia lirima lilie.

¹⁵Olwa obukhalachi bwatooto bukholwanga abalunji basangalanga, nebutswa abakholi bobubi bachoonyanga mumioyo.

¹⁶Omundu obulanga okhulonda injila yobumanyilisi okhufwa khumulindil'langa.

¹⁷Oyanzanga okhwesangasia alaba omutukha; oyanzanga amalwa nende ebiokhulia ebilahi sialaba omuhinda tawe.

¹⁸Ababi beler'ranga esibi esia bateemanga okhwekombela abandu abalunji.

¹⁹Nobulahi okhumenya musitsiimi, okhuyomba okhumenya nomukhasi owokhwekaana nende owokhulembana.

²⁰Abandu abachesi bamenyanga mubuhinda nende mubwale, nebutswa abahingwa balitsanga biosi ebia banyoolanga.

²¹Olondanga obulunji nende tsimbabasi, anyoolanga obulamu nende oluyali.

²²Omusikari omuchesi anyala okhufumila litookho elialindwa nabandu abakufu, ma alibul'le amasisi aka basubilil'langamwo.

²³Owikal'langa omunwakwe nende ol'limilwe; yelindanga omwene khumanyakhano.

²⁴Omundu omweloli khandi oweinjinia — eliiralie ni oweinzekhelesi; akholanga amang'ana musunga yokhutsalikha.

²⁵Abandu abakara abasuulanga okhukhola emilimo namakhono kabwe beyiranga abene.

²⁶Abandu ababi bakhayilwanga om'mbasu kwosi, nebutswa abalunji bahaananga sila okhwimana.

²⁷Omusango kwomundu mubi nes'sinyo khu Nyasaye; ne okhusila muno olwa akuleranga namapaalo amabi.

²⁸Obuloli bwomubehi sibulasubilwa tawe, nebutswa ling'ana liomundu omuhulili lilahuchil'lwa.

²⁹Abandu abalunji babula nende honzoni, nebutswa ababi bateemanga okhwekholokhosia singa obwa banyala.

³⁰Obuchesi bwosi bwabandu, kata okhumanyilisia khwosi, nohomba obwibaali bwosi sibwakhanyala esindu OMWAMI naba nakhusuula tawe.

³¹Etsisululi tsinyala okhurechekhwa khulwe lihe, nebutswa OMWAMI niye ohaananga obulechi.