Read lunyore TSINJELO 22 Bible Online

TSINJELO 22 - lunyore bible

TSINJELO 22

¹Nobulahi okhwela eliira lilahi okhuyomba obuhinda obwinji; ne oluyali luyombele efetsa nohomba etsahabu.

²Abahinda nende abatakha bahambananga halala mbu: OMWAMI niye omulombi wabwe bosi.

³Omundu omuchesi alolanga amabi niketsanga ma yebisa; ne omuhingwa atsitsanga muko hakari ma abelela olunyuma.

⁴Okhwetuuyia nende okhuhelesia OMWAMI oluyali bikhuleer'ranga obuhinda, nende oluyali, nende obulamu.

⁵Amareko nende amahwa kaliho munjila yabasiamu, ne owelindanga alehanya khuko.

⁶Wechesie omwana munjila eyaakwanile okhukhulilamwo, ne yakhachitsul'le mubulamubwe bwosi.

⁷Omuhinda arukanga abatakha; ne owambibwanga libere nomuhambe we uyo omuhambianga.

⁸Oraakanga obubi alachesa amanyakhano; ne indabusi yelirimalie elamuma.

⁹Omuhani alaba neikhabi, okhuba ahelesianga abatakha khubiokhuliabie.

¹⁰Noba nokhunga omundu weinzekhelesi, obusoolo nende obulembani nende esimbamurwe bilahwa.

¹¹Uyo oyanzanga obusiyikhu bwomwoyo, khandi oul'lomanga bulahi, alaba omulina womuruchi.

¹²OMWAMI alolanga akatooto kabikhwanga bulahi, khulwo khufukula amang'ana kababehi.

¹³Omukara yekhalanga hango; aboolanga mbu esimba elamwira naba natsia esioba.

¹⁴Obuheyi nomubero; kutilanga yabo abelirima lio MWAMI lili khubo.

¹⁵Obusilu bwaitsula mumwoyo kwomwana; nebutswa okhutiabwa butinyu khulabwilusia okhurula muye.

¹⁶Osandianga abatakha mbu yenyool'le obukhala, kata uyo ohaananga esihanwa khubahinda, bombi banyoolanga obutakha.

¹⁷Oreche amarwi, nase nzia okhukhwibaal'la amang'ana kabachesi bali okhuboola, weeke ebifune biako

¹⁸ne olaba nobusangali noba noketsul'la, ma nokarumikhila mumang'anako.

¹⁹Ise ndakhenya osubile mu MWAMI; niko akachilanga nikhumanyia amang'ana yaka luno.

²⁰Hano khuhandiichiye amang'ana akaboolwa amakhumi kataru. Kalimwo obuchesi obwinji nende amebaalo amalahi,

²¹ne kalakhwibaal'la amang'ana katooto kene. Ma olwa orumwanga okhukarunilisia, olaleera likalusio liahabwene.

²²Oranuula omumanani sichila nomutakha tawe, kata orakhupia esibi omutakha musiina tawe.

²³OMWAMI alabalwan'na esiina siabwe, ma abanuule obulamu yabo ababanuulanga ababisandu ebindu.

²⁴Orahamba obulina nomundu wayanza oburindi, kata arachenda halala nomundu welirima tawe.

²⁵Wakheka tsifwotsie notiilwa musireko.

²⁶Orabba mulala khu yabo abasinjil'langa omundu khwikobi tawe, kata oresuha okhuhaana esisingo tawe.

²⁷Noba norakharunga omanye mbu kata esitanda siokonangakhwo silabukulwa.

²⁸Oreha esikhoni siakhale siomulwakho, esia abakukabo basimikha tawe.

²⁹Ololanga omundu omusitsa nali hamulimokwe? Yakharumikhile abaruchi, ne tawe abandu butswa.