Read lunyore TSINJELO 23 Bible Online

TSINJELO 23 - lunyore bible

TSINJELO 23

¹Olwa wikhala okhulia halala nende omundu omukhongo, okwana okhumanya bulahi mbu ye niwina owamwikhaye n'naye.

²Noba noli owamare amenji, otiile litundu.

³Orekomba ebinolu bibie tawe. Anyala okhuba natemanga alole obwa oli.

⁴Obe nobuchesi obunyala okhukhukhonya, olekhe okhumala tsingufutsio khulwokhwenya okhunyoola obuhinda.

⁵Noba nora tsimonitsio khubuhinda bulakora, okhuba bumelanga tsimbaha bungoyingoyi, ma bupulukha okhutsia mwikulu singa inditsu.

⁶Oralia esiokhulia siomundu omwimani tawe, kata orekomba ebiokhuliabie ebilahi tawe.

⁷Okhuba obwayehulilanga mumwoyokwe nimbwo ali; akhubool'langa, mbu, “Lia, onywe!” Nebutswa yako sikali niko akali mumwoyokwe tawe.

⁸Olasala bitititi ebioba noliiye, ne amang'ana kaako amalahi kalakora.

⁹Oral'loma amang'ana kobuchesi khumuhingwa tawe; sialakayanza tawe.

¹⁰Oreha ebikhoni biomulwakho lwakhale tawe; kata orabukula omukunda kwabaana ababisandu tawe.

¹¹OMWAMI nomusooli wabwe wetsingufu, niye olalwana n'nawe khulwamang'ana kabwe.

¹²Ore omwoyokwo khumebaalo, khandi amarwiko khumang'ana kobuchesi.

¹³Oralekha okhuchetsihia omwana tawe; okhuba nomutiaba olusaala, siafwa tawe.

¹⁴Noba nomutiabila olusaala, olamuhonia obulamubwe.

¹⁵Omwana wanje noba niwakhaba nobuchesi, nase ndakhasangala.

¹⁶Ndakhayanza okhusila nimba nimbulila noboolanga amang'ana kobuchesi.

¹⁷Orakhayilwa abetsimbi tawe; obuhendeli bwobulamubwo bubetsenje okhuha OMWAMI oluyali.

¹⁸Siahene khuliho nobunaayi mumatukhuko akali hambeli, ne obunaayibwo sibulafwa tawe.

¹⁹Omwana wanje, hulila ma obe omuchesi, ma wemel'le omwoyokwo munjila indahi.

²⁰Orahambana halala nabanywi bewaini inyinji, nohomba nabahwolu bebiokhulia tawe.

²¹Omukholwi wamalwa nende omuhwolu baloola khubutakha. Ne nikali ibe wayanza butswa okhulia nende okhukona, olebikha amatasi.

²²Hulila papawo owakhwibula, ne orachaaya mamawo olwa ali omusiele tawe.

²³Kula akatooto, ne orakakusia tawe; khandi okule obuchesi, nende amebaalo nende okhumanyilisia.

²⁴Samwana omundu omulunji alekhoya okhusila; ne owebula omwana omuchesi alasangala khulwaye.

²⁵Lekha papa uwo nende mama uwo bayanze khulweibe, ne mama uwo owakhwibula yekhoye.

²⁶Omwana wanje, oreke amarwiko bulahi, ma olonde esifwanani siobulamu bwanje.

²⁷Omutamba abetsanga obuko obwatsia hasi muno, ne omukhasi omuheyi nobuko obunyel'le.

²⁸Bakhwekonekhanga singa abanuuli, khandi bameetanga abandu okhubula okhuba abasubilwa.

²⁹Niwina oboolanga mbu, “Bayaye wanje koo!” Niwina oli musibeela? Niwina owamahinge? Niwina oli nende okhwekaana? Niwina oli nende amafumire akarali nesifune? Niwina owakhanyile tsimoni?

³⁰Sibali yabo ababutsanga oluhono m'malwa, abatsitsanga okhuruna amalwa akalombelwe?

³¹Oralekha amalwa kakhubere kata nikali kalul'le pa, kata nikaba nikang'inanga musikombe, nohomba nikaswel'lekhanga nikeekha munda tawe.

³²Olunyuma kalumakanga singa inzokha, kakhanganga singa esilikoma.

³³Tsimonitsio tsilalola amamulamule, ne olakoyana mukhul'loma nende mukhupaala.

³⁴Yee, olaba singa okonanga hasi hakari weinyanza; nohomba singa okonanga khubutenje bwomulingoti kweliaro.

³⁵Olaboola mbu, “Baasindikhile nebutswa sisaaliye tawe. Bakhupachile nebutswa simbuliye tawe. Nambuukhe lina? Nzia okhuruna amalwa kandi.”