Read lunyore TSINJELO 24 Bible Online

TSINJELO 24 - lunyore bible

TSINJELO 24

¹Orakhayilwa abandu ababi tawe. Kata orekomba okhuba omulina wabwe tawe.

²Indiri niyo eyabapaalanga mumioyo chiabwe, khandi lwosi olwa bekulanga omunwa okhwola omundu asalile.

³Inyumba yombokhwanga nobuchesi, nende obumanyilisi.

⁴Ahobumanyi buli ebikoti bitsusibwangamwo nebindu biobukusi khandi ebiokhuyanzisia.

⁵Omundu omuchesi ali nobunyali okhuyomba owetsingufu, ne omundu wobumanyi ayomba omukufu.

⁶Okhwola omundu arechekhe obuloosie obulahi nasili okhutsia mwihe. Noba nonyoola obwibaali obulahi nilwo olwonyala okhuleka.

⁷Obuchesi noburambi khulwo muhingwa okhumanya; sial'lomanga m'mukanda tawe.

⁸Uyo oloosianga okhukhola obubi khasotso; abandu balamulanga mbu omundu weinzoka.

⁹Obuloosie bwosi obwomuhingwa alombanga netsimbi; omunyekani naye nes'sinyo khubasie.

¹⁰Noba notendeya mwitukhu liobutinyu tsingufutsio netsindititi.

¹¹Ohonie yabo abahilwanga mukhufwa, khandi ohonie yabo abahilwanga okhusinzwa.

¹²Noba noboola mbu, “Nebutswa simanyile omundu uyo tawe;” Nyasaye owamanya obwemioyo chili, alakalola omwene; uyo okhulindanga ibe alamanya; alarunga buli mundu okhuhelana nemilimo chiakholanga.

¹³Omwana wanje olitsenje obuukhi, okhuba nobulahi. Khandi singa obweliana liobuukhi bwetsinzukhi lili elielungu munwakwo,

¹⁴omanye mbu nimbwo obuchesi buli obulahi khumwoyokwo. Noba niwakhabunyoola, obulamu bwakhabaho, ne akonaayanga sikalachweya tawe.

¹⁵Orabba singa omubi, okonekhelanga inyumba yomulunji nohomba okhuyaaka hangohe tawe.

¹⁶Kata omulunji naba nakwa hali akhenji buli khasotso amalanga abuukha, nebutswa amakhupako kamumanga ababi.

¹⁷Orayanza olwomusukuwo akwitsanga mumanyakhano tawe, kata orasangala olwa yesiraala tawe;

¹⁸khase OMWAMI alalola, ma asinyikhe ma alekhe okhumuhelesia esinyasio.

¹⁹Orahenda khulwa abakholi betsimbi, kata orekomba ababi tawe.

²⁰Omundu omubi siabalanga khukokhumenya emihika eminji tawe, etaya yiye elasimibwa.

²¹Omwana wanje, ohelesienjie OMWAMI oluyali nende omuruchi; orakhafukulakhwo mulala khubo tawe.

²²Abandu ababafukulanga banyoolanga amatinyu matetekhana. Wakhamanyakhwo amakhupako ka Nyasaye nohomba omuruchi banyala okhuleera?

²³Kano khandi namang'ana akal'lomwa nabachesi: sibuli bulahi okhukhola ebiela olwokhalakanga emiise tawe.

²⁴Omukhalachi obool'langa omubi mbu “Ibe oli omulunji” alalamwa khandi alanyekwa nabandu bosi.

²⁵Ne abahaana esinyasio khubabi balahindihala, ne ikhabi indahi elabakwila.

²⁶Likalusio liahabwene nesilolelo siobulina bwatooto.

²⁷Lomba omulimokwo esioba, khandi orechekhe omukunda; ma olweinyuma wombokhe inyumbayo.

²⁸Orahaana obukobokheli obubi khuwasio sila esifune, nohomba okhuhaana obukobokheli bwob'behi khuye tawe.

²⁹Oraboola mbu, “Namukhol'le singa obwayayikholeye! Runganga likobi likhulu!” tawe.

³⁰Ndabir'riye khumukunda kwomundu omukara, khumukunda kwemisabibu okwomundu uyo obula obuchesi.

³¹Ndahenga ne nindola kwayumbamwo amahwa nende obulimo; Olukaka lwakwo lwamachina nalwo lwali nilwakwa.

³²Ndalola ma ningabikha mumwoyo, ndapaala khuko ma ninzekakhwo elieko mbu:

³³Okhukona hati, nokhurengetsa hati, nokhwefumbel'la amakhono hati nende okhuhuluukha hati,

³⁴nebutswa olwoba nosikona obumanani bulakhwitsila singa omunuuli; khandi obutakha bulakhwitsila singa omundu werechekhele nebilasanwe.