Read lunyore TSINJELO 25 Bible Online

TSINJELO 25 - lunyore bible

TSINJELO 25

¹Tsino khandi netsinjelo tsia Solomoni, etsia abandu ba Hesekia omuruchi wa Yuda bakopakhwo.

²Khuhelesianga Nyasaye oluyali khulwokhubisa amang'ana; khuhelesianga abaruchi oluyali khulwokhwinoosia amabiso.

³Singa obwe likulu lili ehale, khandi singa obweinyanza yatsia olutungu, nimbwo amapaalo kabaruchi karamana okhumanyikha.

⁴Hinia amakokha mufetsa, ma omuruli alahiniamwo esindu esilahi.

⁵Hinia abachetsiyi ababi imbeli womuruchi, ma oburuchibwe bulamanyikha khulwobulunji.

⁶Nosinjila imbeli womuruchi, oreyila imbeli nohomba okhwekhola omundu omukhongo tawe.

⁷Nobulahi okhubool'lwa mbu wesunde emukulu, okhuyomba okhubool'lwa olekhele omundu undi omukhongo obweyangu.

⁸Oraribula matetekhana musiina akomal'le okhulola tawe. Omukobokheli undi inyumawo naba nakhusimbia omurwe, wakhakhola sina?

⁹Kol'losia oburambanebwo nende owasio, ne oraribula eliamambiswi liowasio tawe,

¹⁰khase uyo ouhulilanga yakhakhuchaaya, ma oluyalilwo olubi nilurakhurulakhwo tawe.

¹¹Ling'ana eliboolwanga munjila indahi, lifwana singa amachungwa aketsahabu akali musahani yefetsa.

¹²Singa obwe ingaka yetsahabu eli, khandi singa obwe esimili sietsahabu iseletse sili, nimbwo omukondekheli omuchesi ali khumundu oyanzanga okhuhulila.

¹³Omurumwa omusubilwa asangasianga yabo abamurumanga singa amaatsi amanyifu kasangasinjia mumatukhu kelichesa.

¹⁴Singa amalumbesi nende omuyeka akabulamwo ifula kali, nimbwo abandu abasubisianga ebindu ebia baranyala okhuhaana bafwana.

¹⁵Okhwesimilisia oluhono khuchilanga omuruchi ahuchil'la; ne ol'limi oluhombelesia lufunakanga esiakakhamana.

¹⁶Noba nonyoola obuukhi, olie obukhuhela? Khase wakhalia mbirana ma nosala.

¹⁷Oranala okhutsia munyumba yowasio buli khase tawe; wakhamuchonyia, ma nakhubihil'lwa.

¹⁸Omundu ochiikhanga owasie abetsanga ikhomako, nohomba olukanga, nohomba olusele olwochi.

¹⁹Okhusubila omundu orali omusubila khwitukhu liamanyakhano, khuli singa okhulia nende elino lifuunikhila, khandi singa okhuchenda nende esilenje esifunikhile.

²⁰Owembelanga omundu ositohele omwoyo tsinyembo; afwana singa omundu onabulanga tsingubo tsiowasie mwitukhu liobusindu, nohomba singa oretsanga echumbi khwifumire.

²¹Omusukuwo naba nali neinzala, muhe ebiokhulia; ne naba nali nobuluho, omuhe amaatsi anywe.

²²Ne mbwo olachila tsisoni tsimwire; ne OMWAMI alakhurunga amatani.

²³Obumonyi buleeranga lirima singa butswa omuyeka okurulanga esinyolu kuleeranga ifula.

²⁴Nobulahi okhumenya khunungo, okhuyomba okhumenya halala nomukhasi omulembani.

²⁵Singa obwa amaatsi amasindu kali khumundu oli nobuluho, nimbwo amang'ana amalahi okhurula musibala siehale kali.

²⁶Omundu omulunji okwisibwanga nomundu omubi, ali singa esitaho esitubuukhile nohomba liyabo elilimwo esumu.

²⁷Singa obwa okhulia obuukhi obwinji khuruli okhulahi, nimbwo abandu okhweyenyela oluyali abene khurali okhulahi.

²⁸Noranyala okhwelinda khwirima, kho oli singa litaala elibula oluhinga khandi elisambulukhile.