Read lunyore TSINJELO 26 Bible Online

TSINJELO 26 - lunyore bible

TSINJELO 26

¹Singa etsaluchi erakhwananga musimi, khandi singa ifula erakhwananga mwichesa, nimbwo oluyali lurakhoyele okhuhebwa omuhingwa luli.

²Esilaamo esiorakwan'ne okhunyoola silamela amabaha ma sipulukha singa lirobelesi nohomba eminyi.

³Okhwola ore olutsiha mumolu ke esululi, khandi okhwola onywekhe epunda nende olutsiha, khandi mbwo okhwola omuhingwa ahebwe esinyasio.

⁴Noba nokalusia omuhingwa singa obwelireebolie liobuhingwa lili, nawe wakhafwanana n'naye mubuhingwa.

⁵Kalusia omuhingwa singa obwobuhingwabwe buli, alekhe okhuba omuchesi mumonitsie omwene.

⁶Orumanga ling'ana okhubir'ra mumukhono kwomuhingwa, kali singa okhuremaka ebilenjebie omwene, niyekhaabila amanyakhano.

⁷Singa obwebilenje biomulema bieleelanga butswa; nimbwo tsingano tsifwana muminwa chiabahingwa.

⁸Singa obwomundu abohanga lichina butinyu khumburusi,[2] nimbwo omundu ohelesinjia omuhingwa oluyali afwana.

⁹Singa obwomundu okhol'lwe namalwa ateemanga okhuhiinia lihwa mumukhonokwe, nimbwo tsinjelo tsifwana muminwa chiabahingwa.

¹⁰Uyo ohandikanga omuhingwa nende ababiri emilimo, ali singa omundu olasanga olusele nachomisie abandu bosi.

¹¹Singa imbwa ekalukhanga okhulia mumasale kayo, nimbwo omuhingwa okholanga amang'ana amabi nakalukhilamwo ali.

¹²Omundu omuhingwa okhusila alikhwo obulahi, okhuyomba omundu opaalanga mbu nomuchesi olwa arali omuchesi.

¹³Omukara aboolanga mbu “Esimba eli khunjila! Esimba eli mutsing'anyi!”

¹⁴Singa obwa omuliango kusukhananga khutsipata tsiakwo, nimbwo omukara asukhananga khusitandasie.

¹⁵Omukara atonjelanga omukhonokwe mulutaabo; nebutswa kamuchonyianga okhukuhila khumunwakwe omwene khandi.

¹⁶Omundu omukara apaalanga nomuchesi, okhuyomba abandu bane nabataru abanyala okhuhaana ebifune ebilahi khukamapaalo kabwe.

¹⁷Omundu owetsokanga mubusoolo oburali obubwe tawe, ali singa omundu otilanga imbwa ebirwi.

¹⁸Singa omulalu olasanga ebiochi nende olufu, nasina n'nabio,

¹⁹nimbwo omundu osiamianga owasie ma aboola mbu akhol'lenje butswa tsisambo afwana.

²⁰Sila tsikhwi ne omulilo nikusima; ne ahobutsanzani burali, obusoolo sibubetsangaho tawe.

²¹Singa obwa amanda kahambibwanga nebichienga ebiang'alaye, singa obwe tsikhwi tsihambianga omul'lo, nimbwo omundu omurindi ahambianga obusoolo.

²²Amang'ana komutsanzani kali singa ebironje ebinolu; kenjil'langa elala mukari nikamilwa.

²³Amang'ana kokhubehelesia akabisanga amapaalo komundu, kafwana nende epala eyahomwa khusilonge sielitohi.

²⁴Omundu omukalama abisanga oburima, mumang'anake kokhubehelesia.

²⁵Olwa aboolanga amalahi oramusubila tawe; sichila omwoyokwe kwayitsulamwo nende oburima obwinji.

²⁶Kata naba nabisa oburimabwe mbwena, abandu bosi balalola ebindu ebibi ebia akholanga.

²⁷Yabo abalimilanga abasiabwe omuko bakwitsangamwo abene. Yabo abakongomianga lichina, libakwitsangakhwo abene.

²⁸Ol'limi olubehi luchaayanga yabo aba lusalisisie, ne omunwa kwokhweboola kutibianga.