Read lunyore TSINJELO 27 Bible Online

TSINJELO 27 - lunyore bible

TSINJELO 27

¹Oreyitsoomia khukamukamba tawe; okhuba siomanyile esielitukhu naliibule tawe.

²Lekha abandu bandi kata abacheni bakhwitsoomie; ne iwe omwene oreyitsoomia tawe.

³Lichina nende omuyekhe nebisiro; nebutswa lileko liomuhingwa nelisiro okhuyomba biosi.

⁴Lirima nelilulu khandi eliokhwononia, nebutswa imbalikha neimbibibi okhuliyomba.

⁵Obukondekheli bwa habulafu nobulahi, okhuyomba obuyanzi obwamambiswi.

⁶Abalina banyala okhusubilwa kata nibaba nibakhusalisia: Nebutswa omusuku naba nakhufumbel'la, ohenge bulahi.

⁷Omundu owikur're abihil'lwa obuukhi, nebutswa khumundu oli neinzala siesindu esilulu nesielungu.

⁸Singa linyonyi eliboyaboyanga okhurula khusitsu sialio, nimbwo omundu oboyaboyanga okhurula hango uwe afwana.

⁹Amafura kookhwebakha nende omusaala kwesing'ari bisangasianga omwoyo; nimbwo obulahi bwomulina bulemianga omundu omwoyo.

¹⁰Orebil'la abalinabo nohomba abalina bapapa uwo tawe. Noba noli nobutinyu, oratsia okhuruna obukhonyi khumusiani wenywe tawe. Omumenyaniwo owahembi anyala okhukhukhonya, okhuyomba omusiani wenywe oli ehale.

¹¹Omwana wanje, obe omuchesi, nase nzia okhusangala; Nambe nende likalusio elia nambool'le siomundu ounzekulanga.

¹²Abandu bobuchesi balolanga amatinyu niketsanga ma bakebelenga, nebutswa uyo orali nobuchesi atsitsanga ma yenjila muko, olunyuma yetula omwene.

¹³Bukula ingubo ye uyo osingilanga omucheni esisingo; khulwe yako akwana okhuhaana emianduchie singa esisingo.

¹⁴Omundu naba nalaamila omulinawe ikhabi nalokhoma mukamba tsuli, kalabalwa khuye singa okhulaama esilaamo siobubi.

¹⁵Omukhasi omulembani afwana singa amaatsi akaronyanga, te te te khwitukhu lieifula.

¹⁶Okhumwikal'la okhulembana kafwana nende okhwikal'la omuyeka? Nohomba okhufumila amafura mumukhono omulunji?

¹⁷Esibia siyiakalanga esibia; nimbwo omundu ayiakalanga owasie.

¹⁸Otendanga omukhuyu alalia khubiamo biakwo; naye outendanga omwamiwe alahebwa oluyali.

¹⁹Singa obwa mumoni mulolananga nomumoni mundi mumaatsi, nimbwo omundu alolekhelanga mumapaaloke omwene.

²⁰Singa obwe Emakombe nende okhufwa birekuranga, nimbwo tsimoni tsiabandu sitsikuranga tawe.

²¹Efetsa nende etsahabu bichelwanga okhubir'ra mumol'le, ne omundu achelwanga nende oluyali lwa anyoolanga.

²²Kata niwakhatuya omusilu musinu nomuswachilo, singa obuswache, kata mbwo obusilubwe sibunyala okhurula khuye tawe.

²³Waaye amakondiko nende tsing'ombetsio bulahi noreyekhwo esinani,

²⁴sichila obuhinda sibumenyanga emihika chiosi tawe. Kata amahanga sikamenyanga inziayo tawe.

²⁵Olwobunyasi buremulwanga nende obulimo bwokhubikulu nilwo olwomuboka kulolekhanga.

²⁶Onyala okhunaba tsingubo khubwoya bwamakondi nokula omukunda khumasendi akakusibubwe tsimbusi.

²⁷Amabeele ketsimbusi nako kalabaho akahela khuibe nende khubeinyumbayo.