Read lunyore TSINJELO 28 Bible Online

TSINJELO 28 - lunyore bible

TSINJELO 28

¹Ababi beelukhanga olwo omundu arabbalondel'langa tawe, ne abalunji nabeikholo inyomu singa esimba.

²Olwelihanga libetsangamwo abandu beinduli libetsanga nabaruchi abenji. Nebutswa niliba nabandu bokhumanyilisia nende abobuchesi oburalilu bwalio bulahindila oluhono.

³Omwami onyasianga abamanani afwana singa ifula yomukhulul'la eyihilanga ebiokhulia biosi.

⁴Abasuulanga amalako betsoomianga ababi; nebutswa abakalondanga babihil'lwanga ababi.

⁵Abandu ababi sibamanyilisianga obukhalachi bwatooto tawe; nebutswa yabo abekayakayanga OMWAMI babumanyilisinjia.

⁶Nobulahi okhuba omumanani oubulakhwo esikha mumang'ana kosi, okhuyomba omundu omuhinda owasiama mumang'anake.

⁷Omwana oulilanga amalako nomuchesi; nebutswa ochendanga nabalangu asimbianga samwana omurwe.

⁸Noba nometekha mumianduchio khulwokhunyoola obukhala nende injelesio, emianduchio chiakhatsie khumundu okhol'langa abamanani aketsimbabasi.

⁹Owikalanga amarwi kalekhe okhuhulila amalako, kata lisaayolie nelies'sinyo khu Nyasaye.

¹⁰Owemel'langa abalunji okhutsia khunjila imbi, ye omwene alakwa mubukobwe; Abalunji bakhanyoole obulaame bwetsikhabi.

¹¹Abandu abahinda bapaalanga nabachesi, nebutswa omumanani oli nokhumanyilisia wamanya bulahi.

¹²Olwa abalunji banyoolanga obulechi oluyali lubetsangaho olwinji, ne olwa ababi bamihanga, abandu beebisanga.

¹³Ofuunikhanga tsimbitsie sanyala okhukaasa tawe, ne oweyamanga tsimbi natsilekha, Nyasaye alamubeela tsimbabasi.

¹⁴Noweikhabi omundu ohelesinjia OMWAMI oluyali khasotso. Uyo otinyianga omwoyokwe alakwa mumabi.

¹⁵Singa esimba eyihumanga, khandi singa libungwe elikhasanga, nimbwo omuruchi omubi atiimianga abandu abamanani.

¹⁶Omwemeli orali nokhumanyilisia alul'langa abandu nabasandia, nebutswa uyo obihil'lwanga obukhala bwobunuuli, alamiha oluhono olurambi.

¹⁷Omundu omwiri yelukhilanga musibala sindi okhwebisamwo okhwola olwa alifwa. Omundu aramukhonyakhwo tawe.

¹⁸Oba nachendanga bulunji alahonibwa; ne uyo osiamanga munjilatsie, alanguha alakwa.

¹⁹Olimanga omukundakwe alanyoola ebiokhulia ebimuhela; ne oulondanga amang'ana kabutswa anyoola obutakha obwinji.

²⁰Omundu omusubilwa aletsula netsikhabi tsinyinji; ne uyo otetekhana okhuhindihala sialabula okhunyoola esinyasio tawe.

²¹Okhukhola ebiela mubandu sibuli obulahi tawe; ne abandu balakhola amabi khulwa okhunyoola ebihetso.

²²Omwimani atetekhan'nanga obuhinda, ne siamanyile mbu obutakha bulamwitsila tawe.

²³Okondekhelanga omundu alanyoola obukosia olunyuma, okhuyomba uyo okholanga inzekhelesi.

²⁴Owibilanga samwana nohomba nyina, ma aboola mbu “Sibuli obubi tawe;” siali obulahi okhuyomba omwibi wosi tawe.

²⁵Omundu omuhwolu abuusinjia obusoolo, ne uyo osubilanga OMWAMI alasitohibwa.

²⁶Uyo osubilanga amapaalo komwoyokwe omwene nomuhingwa. Uyo owechendelesia mubuchesi alahonibwa.

²⁷Ohelesinjia abamanani ebindu sianyala okhutakha tawe; ne uyo owikalanga tsimonitsie khubamanani abandu abenji balamulaama.

²⁸Olwababi banyoolanga obunyali, abandu bebisanga, ne olwobunyali bubarulangakhwo, ne abalunji nibamiha khandi.