Read lunyore TSINJELO 3 Bible Online

TSINJELO 3 - lunyore bible

TSINJELO 3

¹Omwana wanje, orebil'la amebaalo kanje tawe; habula omwoyo kukwo kufumile amalako kanje khasotso.

²Amebaalo kanje kalakhumeeta emihika eminji echiobulamu bwomulembe.

³Oralekha obuyanzi nende obusubilwa bikhurulekhwo tawe. Obibohe mwikosi mumwo; obihandike mumwoyo kukwo.

⁴Noba nokhola mbwo, olanyoola esirenda nende oluyali ol'lahi imbeli wa Nyasaye nende imbeli wabandu.

⁵Osubile mu MWAMI nende omwoyo kukwo kwosi, ne orakheleeta khubuchesi bubwo omwene tawe.

⁶Witsul'le OMWAMI munjila tsitsio tsiosi, ne naye alakhumanyia injila indahi.

⁷Orabba omuchesi khububwo omwene tawe; ohelesie OMWAMI oluyali ma wehanye tsimbi.

⁸Noba nokhola mbwo kalaba singa indesi indahi ehonianga ebitonda bibio nesiling'ania obutsunwi bubwo.

⁹Helesia OMWAMI oluyali khulwokhumulombela omusango khumiandu chichio, nende khubirongoolwa biebiamo bibio biosi.

¹⁰Noba nokhola mbwo ebiachi bibio bitsa okhwitsulamwo ebindu ebinji, khandi mutsiisumbi tsitsio muletsulamwo ewaini inyinji.

¹¹Omwana wanje, orachaaya amang'ana ko MWAMI olwa akhukondokhelanga tawe, orachonya mumakani olwa akhukondokhelanga tawe.

¹²OMWAMI akol'losianga uyo owa ayanzanga singa obwa samwana okol'losianga omusiani uwe owa yayanza.

¹³Noweikhabi omundu wosi oli nobuchesi, khandi onyoolanga okhumanyilisia.

¹⁴Obukhala bwabwo nobulahi okhuyomba obukhala bwefetsa ne inganga yabwo neindahi okhuyomba etsahabu.

¹⁵Obuchesi buyomba tsinyuma tsinzakhanyu; mubindu biosi ebia wakhekomba sibulaho esiakhahelanibwa n'nabwo tawe.

¹⁶Obuchesi bukhuhelesianga obulamu bwemihika eminji halala nende obuhinda nende oluyali.

¹⁷Tsinjila tsiabwo netsinjila tsiokhuyanzisia, tsing'anyi tsiabwo tsiosi tsiomulembe.

¹⁸Obuchesi nomusaala kwobulamu khuyabo ababuhandakhwo; noweikhabi siomundu obuhandangakhwo.

¹⁹OMWAMI yalonga esibala narumikhilanga obuchesibwe; khulwo khumanyilisiakhwe yasinjisia likulu.

²⁰Obuchesibwe bwachila emichela nichitsulamwo amaatsi, ne amalumbesi nako nikahana ifula khusibala.

²¹Omwana omusiani wanje, ohande khubuchesi nende khubulwenyukhu. Oralekha bikhurulekhwo tawe.

²²Bilakhuheelesia obulamu bwokhuyanzisia khandi obwobusangali.

²³Ma olachenda khunjila yiyo bulahi mumulembe, ne esilenje sisio sisilesikar'rakhwo tawe.

²⁴Solaba noburi olwoba notsitsanga okhukona tawe; ne olakona tsindoolo tsindahi obutukhu bwosi.

²⁵Solaba nesihenda mwoyo khumakhupako kakhetsa matetekhana, singa akakwilangakhwo abandu ababi singa imbumbuyeka tawe.

²⁶OMWAMI alakhulinda bulahi mbu obe mumulembe. Ye salalekha ohambwe mumubero tawe.

²⁷Okhol'le abandu amalahi akabakwanile olwoli nobweyangu bwokhukakhola.

²⁸Orabool'la owasio mbu, “Tsia, nokalukhe, mukamba nakhuhe”, ne noli n'nasio, tawe.

²⁹Orarechekhela owasio amang'ana amabi olwa mumenyele n'naye ahembi nomulembe tawe.

³⁰Orasoolana nomundu sila esifune olwa arakhukholeye obubi bwosi tawe.

³¹Orakhaayilwakhwo abandu bobusoolo nohomba okhukhola singa bo bakholanga tawe,

³²sichila abandu ababi nabees'sinyo khu MWAMI, nebutswa abandu abalunji nabalina baabe abasubilwa.

³³OMWAMI aretsanga esilaamo esiobubi khutsingo tsiabandu ababi nebutswa ahaananga tsikhabi khutsingo tsiabandu abalunji.

³⁴Tooto mwene, abula obuha nabandu bokhwehila ikulu, nebutswa khu yabo abetutuyianga abamanyianga esirenda sisie.

³⁵Abachesi balalaamilwa oluyali, nebutswa abahingwa balanyoola es'simba murwe.