Read lunyore TSINJELO 30 Bible Online

TSINJELO 30 - lunyore bible

TSINJELO 30

¹Kano namang'ana ka Akuru omusiani wa Yake, okhurula Masa. Omundu tsana yaboolela Itsieli, yee, yaboolela Itsieli nende Ukali mbu[3].

²“Tooto mwene sibulaho esiamanyile okhuyomba abandu bosi; kata sindi nokhumanyilisia singa abandu bandi tawe.

³Sindayekakhwo obuchesi bwosi tawe, ne sindamanyakhwo esindu khu Nyasaye omutsienukhu tawe.

⁴Niwina owaniinakhwo okhutsia mwikulu khandi niyekha? Niwina owafumbarakhwo omuyeka mumukhonokwe? Nohomba owanyala okhuboha amaatsi kosi akesibala munguboye? Niwina owarakhwoho tsinzakho tsiosi etsiesibala? Eliiralie niwina, khandi eliira liomwanawe niwina? Mbool'la noba nomanyile!

⁵“Nyasaye ahesianga sieling'ana eliasubisianga. Ye ali singa esikhumba khuyabo abarunanga okhusoolwa n'naye.

⁶Orameeta ling'ana khumang'anake tawe; yakhakhukondokhela, ma nonyoolekha noli omubehi.”

⁷Nyasaye, khureebanga mbu, umbuchil'le okhunyoola ebindu bibili nisili okhufwa.

⁸Oralekha mbe omubehi tawe khandi oralekha mbe omutakha nohomba omuhinda tawe. Kho umbelesie butswa esiokhulia simbel'le.

⁹Nimba n'nabio ebinji okhuyomba esichela, ndakhwambakhana nimboola mbu, “OMWAMI niye wina?” Ne nindakhaba omutakha, nzukhan'na ninziba ma nindera es'simba murwe khuibe Nyasaye wanje.

¹⁰Orachiikha omurumikhili khu mwamiwe tawe, khase yakhakhulaka esilaka munwa ma esiina nisikhufwila.

¹¹Luliho olwibulo lwabandu abanyekanga abasamwana babwe, khandi abarahaananga oluyali khubamama babwe tawe.

¹²Luliho olwibulo lwabandu abelolanga okhuba abasiiyikhu mumoni tsiabwe abene, ne sibasiiywa khububi bwabwe tawe.

¹³Luliho olwibulo lwabandu abepaalanga nabalahi — O mako obwa belolanga okhuba abalahi abene!

¹⁴Baliho abandu, abalilil'langa abamanani nende abatakha nibabalul'la. Yee, nimbwo banyoolanga ebia bamenyela.

¹⁵Likhukhuni lili nabaana abakhaana babili ababoolanga mbu, “Mbe, mbe!” Biliho ebindu bitaru ebirekuranga tawe, yee, nibine ebiraboolanga mbu bihel'le tawe.

¹⁶Ebiatsana mbiebi mbu, esibala sie Makombe, omukhasi orebulanga, liloba eliomu elieifula erakwitsangamwo, nende omul'lo okwatukhanga sila okhusimibwa.

¹⁷Yabo abakhol'langa abasamwana babwe inzekhelesi, nohomba abachaayanga abanyina mubusiele bwabwe, bakwana okhulibwa netsisori, netsimoni tsiabwe nitsitsomolwa nende amakhokho.

¹⁸Biliho ebindu bine ebili ebiokhuchenyia khu ise, ebia ranyala okhumanyilisia.

¹⁹Nabio mbiebino: injila yeinditsu epulukhilangakhwo mwikulu, obweinzokha emoolanga khulwanda, obweemeli echendanga munyanza hakari, nende obwomusiani nende omukhaana bayanzananga.

²⁰Kano niko akomukhasi omuheyi akholanga: akholanga obuheyi ma yesinga omubili ma aboola mbu, “Sikhol'le obubi bwosi tawe.”

²¹Kaliho amang'ana kane akachilanga esibala nisitechela, khandi, akasiranyala okhuhuchil'la.

²²Ngakano mbu: Omusumba olwa akwa omuruchi, khandi omuhingwa olwa yekur're ebiokhulia;

²³khandi omukhaana wesibindi olwa ateesibwa, khandi omukhasi omusumba olwa abukula obukono bwomukhaye owa yakhol'langa emilimo.

²⁴Biliho ebindu bine ebili ebitututu musibala, nebutswa nebichesi okhusila.

²⁵Chindukusi: sichili netsingufu tawe, ne kata mbwo chirechekhanga ebiokhulia biachio mwichesa.

²⁶Amachenieli: nako khandi namatekhele, nebutswa kalombanga obumenyo bwako mutsinyanda.

²⁷Tsisiche sitsili nomuruchi tawe, nebutswa tsisamulanga tsiosi mumikanda chiatsio.

²⁸Lisiakale: elionyala okhutiila namakhono, nebutswa linyoolekhanga munyumba tsiabaruchi.

²⁹Biliho ebindu bitaru ebili nokhuchenda khweng'oono, yee, nibine ebichendanga neng'oono;

³⁰esimba eyili netsingufu mutsisolo tsiosi, ne sieritsanga esolo yosi tawe;

³¹etaywa yoluyaye; kata imbusi ekhole khandi, nende omuruchi nali nabasikaribe nibamufumbiye.

³²Noba niwali omuhingwa ma noba neinjinia, nohomba noba niwali niwaloosia obubi, ranga wepaalekhwo.

³³Okhusaatsa amabeele khuleeranga esiachi; ne okhutuya amolu komundu khuhinianga amatsahi; nimbwo okhuchema lirima khuleranga obusoolo.