Read lunyore TSINJELO 31 Bible Online

TSINJELO 31 - lunyore bible

TSINJELO 31

¹Tsino netsinjelo tsia Lamweli, Omuruchi wa Masa aka nyina yamwechesia;

²“Ibe niwe, omwana wanje owandebula. Niwe likalusio liamasaayo kanje. Nisina esia nyala okhukhubool'la?

³Orahelesia abakhasi tsingufu tsitsio tawe, sichila nibo abononinjia abaruchi.

⁴Hulila ibe Lamweli. Sibuli bulahi abaruchi okhunywa amalwa, nohomba okhwekomba okhumanya ahamalwa kali tawe?

⁵Olwa banywetsanga bebil'langa amalako, nibabula okhukhol'la yabo abakhupanga esibi akahabwene.

⁶Abanywetsanga amalwa niyabo abali ahembi okhufwa nende yabo abali musibi.

⁷Lekha banywe ma bebil'le obutakha bwabwe, nende esibeela siabwe.

⁸“Ol'lomele abandu abaranyala okhul'loma abene. Osoole abali abatimi.

⁹Obal'lomele ma obe omukhalachi wahabwene. Osoole amang'ana kabamanani nende akabatakha.”

¹⁰Niwina onyala okhunyoola omukhasi weifwo indahi? Obukhalabwe nobukali okhuyomba obwetsinyuma tsinzakhanyu.

¹¹Omusaatsawe aretsanga obusubilibwe muye amatukhu kosi, ne satakhanga esindu siosi esilahi tawe.

¹²Amukholelanga omusaatsawe obulahi bwonyene amatukhu kosi, ne tawe okhumusaalisia.

¹³Anabanga tsingubo tsiobwoya nende etsiekatani, nakhola emilimo namakhonoke nobusangali.

¹⁴Singa etsimeeli tsiabakhala, asumanga ebiokhulia okhurula ehale.

¹⁵Abuukhanga khale, nakabul'la abeinyumbaye ebiokhulia, nende okhubool'la abakholibe abakhaana emilimo chiabakhola.

¹⁶Ahenganga omukunda, ma akukula, ne khumapesa kabetsanga nanyooye arumikhilanga okhusimikha emisabibu.

¹⁷Akholanga emilimo butinyu nareyekhwo omwoyo nesinani siosi.

¹⁸Alolanga mbu obukhalabwe bulimwo obukhonyi, etayaye siesimanga butukhu tawe.

¹⁹Asiranga obuusibwe omwene nalukha tsingubotsie.

²⁰Ahaanilanga abatakha nende abamanani namakhono amasiro.

²¹Siaritsanga olwomunyiri kuliho tawe, sichila abomunyumbaye bosi bali netsingubo tsioluuya.

²²Yelombelanga ebiokhwefuunikha ebilahi, tsingubotsie netsiekatani isembe indorotoro.

²³Omusaatsawe wamanyikha mumikhung'ano chiomwitookho singa mulala khubandu boluyali.

²⁴Anabanga tsingubo tsiekatani nende tsikhoba tsiokhweboha natsikusia khubakhala.

²⁵Ali netsingufu nende oluyali ne sarisibwanga nende amatukhu aketsanga tawe.

²⁶Al'lomanga amang'ana kobuchesi; ne amebaalo ketsimbabasi kali khul'limilwe.

²⁷Akhaabilanga abeinyumbaye ebiabatakhanga, ne sialitsanga ebiokhulia biobukara tawe.

²⁸Abaanabe basinjilanga, nibamulanga mbu noweikhabi; omusaatsawe naye amwitsoominjia.

²⁹Aboolanga mbu, “Abakhasi abenji bakhol'le obulahi, nebutswa iwe ubayombele bosi.”

³⁰Okhuyanzisia khukatanga, ne likondo lilahi nibutswa, nebutswa omukhasi ohelesinjia OMWAMI oluyali niye owitsoomibwanga.

³¹Muhelesie oluyali khu kosi aka akholanga, akhoya okhwitsoomibwa habulafu.