Read lunyore TSINJELO 4 Bible Online

TSINJELO 4 - lunyore bible

TSINJELO 4

¹Inywe abasiani banje, hulile amebaalo ka papa wenywe. Murechelesie, nenywe mulaba abanyala okhukamanyilisia.

²Amang'ana akamwibal'langa namebaalo amalahi kho muketsul'le kosi.

³Kata nase khandi ndali omusiani wa papa, omutoro omutelwa wamama.

⁴Ne papa yanzibaal'la, niyambool'la mbu, “Witsul'le amang'ana kanje ne orakebil'la tawe. Okhole aka khubool'langa nawe witsa khuba nobulamu.

⁵Onyole obuchesi, nende obulwenyukhu! Orabibil'la tawe, nohomba okhole esikala marwi khumang'ana kanje tawe;

⁶Orakhalekha obuchesi nabwo bwitsa okhukhusoola; obuyanze, nabwo bulakhulinda.

⁷Okhunyoola obuchesi nisio esindu esikhongo esionyala khunyoola. Esindu siosi esiokhola osimanyilisie bulahi.

⁸Yanza obuchesi nabwo bulakhuchingula. Obufumbel'le, nabwo bulakhuler'ra oluyali.

⁹Obuchesi bulaba olusimbi lwokhukhuhesia oluyali khumurwe kukwo.”

¹⁰Iwe omusiani wanje, hulila! Obukula obuha khumang'ana kakhubool'langa, ne olamenya emihika eminji.

¹¹Ndakhwibaliye amang'ana kobuchesi nende injila indahi yokhumenyela.

¹²Olwa ochendanga, sibulaho esilekal'la ebilenje bibio; ne noba niwilukha, siolesikar'ra tawe.

¹³Fumila amalako obutinyu; ne orakhalekhakhwo liosi tawe okahandekhwo; okhuba niko obulamu bubwo.

¹⁴Orenjila m'mukanda kwabandu ababi tawe. Kata orachendela munjila yabandu abasiamu tawe.

¹⁵Ochiehanye ne orachilondakhwo tawe. Ochisuule ma olonde injilayo omwene.

¹⁶Ababi sibakonanga nibarakhol'le tsimbi tawe. Nibahonganga nibahenganga obutukhu bwosi okhwola olwa basalisia omundu.

¹⁷Okhuba ebiakhulia biabalitsanga binyoolekhanga mubwonekhu ne ewaini yabanywetsanga enyoolekhanga mbwirani.

¹⁸Olung'anyi lwabalunji balondangakhwo luli singa obulafu bweliuba lirulanga obumetekhanga okhwakha okhwola om'basu kwosi.

¹⁹Ne injila yababii efwana esilima esimwamu ti. Bakwitsanga ne sibamanyile esichilanga mbakwa tawe.

²⁰Omwana wanje, hulila amang'ana kanje. Oreke amarwi khu akamboolanga.

²¹Oralekha karule khuibe tawe. Oketsul'le ma okabikhe mumwoyo kukwo.

²²Kalahaana obulamu khubandu yabo abakamanyilisianga khandi obuhoni khumibili chiabwe chiosi.

²³Olinde omwoyo kukwo nesinani siosi; sichila nikwo es'sina siobulamu.

²⁴Oraboolakhwo ling'ana liosi elirali eliatooto tawe. Wehanye amang'ana kobubehi khandi akokhusiamia.

²⁵Tsimoni tsitsio tsihengenje imbeli tili, orangaale tsimoni tsitsio khubindu ebili imbeli uwo.

²⁶Oloosie bulahi akochoomanga okhukhola, ne kosi akokhola kalaba akahabwene.

²⁷Orebera khumukhono mukhasi nohomba khumukhono kukwo omusaatsa tawe; hinia esilenje sisio sirule mububi.