Read lunyore TSINJELO 5 Bible Online

TSINJELO 5 - lunyore bible

TSINJELO 5

¹Omusiani wanje, rekelesia khukobuchesi bwanje; reka amarwi khubulwenyukhu bwanje.

²Nilwo olwa nobetsenje nende obwetembelesi, ne amang'ana kaako nakamanyie mbu oli nobumanyi.

³Omunwa kwomukhasi omuheyi singa obuukhi, ne omunwa kukwe nomurel'le okhuyomba amafura,

⁴nebutswa mukhumal'likha akhulekhanga mubululu nende mukhutsunwa.

⁵Alakhuhila muusi musibala sie Makombe; injila yachendelangakhwo neyokhutsia mukhufwa.

⁶Ye samenyanga khunjila yokhutsia mubulamu tawe; nomuchendachendi munjila tsitsie, ne samanyile nisina esiekholekhanga tawe.

⁷Kho luno, abasiani banje, mumbulile, ne murebil'la amang'ana akamubool'langa tawe.

⁸Mwilukhe okhurula khumukhasi ofwana mbwo! Kata muratsiakhwo ahembi khumuliango kweinyumba yiye tawe.

⁹Khase abandi bakhakhunuula oluyali lulwo; ne wakhafwa nosili omubuukha mumakhono akeyabo ababula tsimbabasi.

¹⁰Abarende bakhabukula emiandu chichio chiosi, ne ebindu biawakhaba niwanyool'la muluuya biakhaba ebiomundu undi.

¹¹Wakhakona khusitanda siesihesi sisio, nobinda olweinyama yiyo nende omubili kukwo biakhaba nibikhuhweleleye,

¹²ne noboola mbu, “Nisina esiachila niralonda amebaalo? Busina ndali okhusuula okhuchetseyibwa?

¹³Kata sindahulilakhwo abebaali banje tawe, kata okhureka amarwi khubo abanzibaal'langa tawe.

¹⁴Ne nonoho ndanyoola nindi nes'simba murwe imbeli wabandu bosi.”

¹⁵Obetsenje omusubilwa khumukhasiwo omwene, ne omuyanze ye yenyene.

¹⁶Orabba singa esitaho esia buli mukhasi atayangamwo amaatsi tawe.

¹⁷Welinde omwene khulwomukhasiwo ne tawe khulwabakhasi bandi.

¹⁸Kho oyanzisibwe nomukhasiwo ne osangal'le omukhasi uwo owawateesia.

¹⁹Ye nowelikondo lilahi khandi owokhuyanzisia singa esitsusu. Obuyanzibwe bukhusangasie ma akhubotokhane nobuyanzi bubwe khasotso.

²⁰Okhuba nisina esiakhachila ibe, omwana wanje okor're khumukhasi omuheyi, nosangal'la obuyanzi bwomukhasi womundu undi?

²¹OMWAMI alolanga kosi akokholanga. Hosi ahotsitsanga OMWAMI akhukoolanga.

²²Tsimbi tsiabandu ababi nomubero khubo. Balahambilwa mwikoko lietsimbi tsiabwe abene.

²³Balafwa khulwokhubula okhwelinda abene. Obuhingwa bwabwe obwinji bulabahila musilindwa.