Read lunyore TSINJELO 6 Bible Online

TSINJELO 6 - lunyore bible

TSINJELO 6

¹Omusiani wanje, mbula wakhaba niwesuha okhusinjil'la owasio khwikobi, nohomba okhusinjil'la omundu woramanyile noho?

²Mbula wakhaba niwanyoolel'lwa nesiesuho sisio ma notilikha namang'ana kawasubisia noho?

³Kho kano niko akokhoyele okhukhola khulwokhwehonia ibe, omwana wanje; olwomal'le okhusinjil'la omundu undi otsie khuye bwangu niwetutuhisie ma omuhombe akhubeele.

⁴Orahuchil'la tsimonitsio okhukona tsindoolo, kata ebikwochi okhurenjetsa tawe.

⁵Wehonie singa esitsusu mumukhono kwomuhitsi, nohomba singa linyonyi mumukhono kwomuruchi.

⁶Ibe omukara tsia khumache ma ohenge obwa kamenyanga ma ochetsihe.

⁷Kata olwa karali nende omwami kata omwemeli, nohomba omuruchi,

⁸karechekhanga ebiokhulia biako mwichesa.

⁹Ibe omukara, nokone okhwola lina? Nobuukhe lina mundoolotsio?

¹⁰Oboolanga mbu, “Nangonekhwo hati, nokhurengetsa khuti, nokhwefumbel'la hati khulwa okhuhuluukha.”

¹¹Nebutswa olwa asikona ne obutakha bumwitsila nibumuseera singa omunuuli, oli nebilasan'nwe.

¹²Abandu ababi khandi abahingwa bachendanga nibaboola akobubehi.

¹³Basimanga tsimoni, nende okhutuya esilenje hasi ne basimilanga ebitere khulwokhukhukaata,

¹⁴olwa babetsanga nibaloosianga okhukhola amabi mumakani kabwe amasiamu, ne nibaloosia okhukhola indiri habundu hosi.

¹⁵Niko akachilanga amabi kabetselanga matetekhana; ne basalisibwa obubi okhusila.

¹⁶Biliho ebindu bine nabitaru ebiaasinya OMWAMI ebia aranyala okhubiefwila.

¹⁷Nabio mbiebino: Okhuhenga khwokhwelola, nende ol'limi olubehanga, amakhono akeeranga abandu barali nesikha.

¹⁸Amapaalo akaloosianga amang'ana amabi, ebilenje bilukhanga bwangu okhukhola amabi,

¹⁹omukobokheli oboolanga obubehi, nameeta khubundi, nende omundu uyo oleeranga inzoka hakari habaana bomundu.

²⁰Omwana wanje, olinde lilako liapapawo ne oralekha amebaalo kamama uwo tawe.

²¹Okabikhe khasotso mumwoyokwo, nokaboha mumwoyo kukwo.

²²Olwa ochenda, kalakhwemel'la; ne olwa okona, kalakhulinda, ne olwa osimukukhwa, kalabool'lana n'nawe.

²³Amalako kakbwe netaya eyatukhanga; ne amebaalo niko kamalako kakhanga nobulafu obukali; kalakhwibaal'la obwokwananga okhumenya.

²⁴Kanyala okhukhulinda khumukhasi wabene, nende khukhuhombelesia khwol'limi lwomukhasi omuheyi.

²⁵Mumwoyokwo orekomba obulahi bwelikondolie tawe; kata orahuchil'la akhukhwese nende ebisiche bietsimonitsie tawe.

²⁶Okhuba omurungo kwomukhasi omutamba kuhela omukaati mulala, nebutswa obuheyi nomukhasi wabene bulakosia biosi ebioli nabio.

²⁷Omundu yakhanyala okhuchinjila omul'lo khusilifusie, ma ebichendelwabie nibibula okhuyia noho?

²⁸Nohomba omundu yakhanyala okhuseena khumanda akang'alaye, ma indubar'roye ebule okhuyia noho?

²⁹Nimbwo kali amang'ana amatinyu okhukona nomukhasi wabene. Omundu oba namutiilakhwo siabula okhunyoola esinyasio tawe.

³⁰Abandu sibachaayanga omwibi olwaba niyeba ebiokhulia olwaba nali neinzala tawe.

³¹Nebutswa naba nanyoolwa, alarunga esiakhane nakhataru, alahinia emianduchiosi echiomunzuye.

³²Nebutswa oba naheya nomukhasi undi, omundu mwene uyo abula obuchesi. Okholanga mbwo yeyononianga omwene.

³³Alanyoola amakhupako, ne oluyalilwe nilwisibwa, ne alaba nes'simba murwe siemihika chiosi.

³⁴Okhuba imbalikha ehetsanga omusaatsa lirima likali, ne sialamubeela tsimbabasi olwaba narunganga es'sialia tawe.

³⁵Sialahuchil'la omurungo kwosi tawe; khandi sialahutsulukha tawe, kata naba nahaana ebihanwa ebinji.