Read lunyore TSINJELO 7 Bible Online

TSINJELO 7 - lunyore bible

TSINJELO 7

¹Omusiani wanje, witsul'le amang'ana kanje, ne orebil'la amalako kanje tawe.

²Olonde amalako kanje nawe olaba omulamu. Olonde amebaalo kanje, nokalonda singa obwolindanga indol'lo yeimoniyo.

³Obikhe amebaalo kanje mumurwe kukwo; okahandike mumwoyokwo.

⁴Obukule obuchesi bufwane singa mbotsowo, obulwenyukhu nabwo bube singa Omwikhowo owahembi.

⁵Yibio bilakhwikal'la khumukhasi omuheyi, khumutamba ohombelesianga namang'anake.

⁶Litukhu lindi ndahengel'la musianzwi sieinzu yanje,

⁷ne ndalola ababuukha abenji ababula obuchesi, nebutswa ndamanyilisiakhwo omusiani mulala omuhingwa.

⁸Yali nabiranga khumuhanda hamasanganjila ahomukhasi undi yamenya. Yabir'ra ahembi ninyumba yomukhasi uyo

⁹isi nemal'le okhumwama.

¹⁰Ne lola omukhasi uyo yamwakan'na; yali niyebikhile tsingubo singa etsiomutamba, ne yali neyelosianga omupele mumwoyokwe.

¹¹Yali omukhasi omukhulumamu owahwa amaatsi m'moni, ne siyekhalanga munzuye tawe.

¹²Luusi ali mumihanda, luusi ali musiiro, nahichilanga siabuli mumasanganjila.

¹³Ma omukhasi tsana yafumbel'la omusiani uyo namutsunzuna, namwomela imoni, ma namubool'la mbu,

¹⁴“Ndali okhuhaana omusango litukhu lino, ne ndi neinyama erul'le khumusango tsana.

¹⁵Kho ndali okhurula esioba nikhurunanga ibe nende esinani. Nyenyelenje khunyoole ma khunyooye.

¹⁶Nzal'le esitanda sianje nende emito emilahi, nende tsingubo tsietsikhoosi tsiekatani ye Misiri.

¹⁷Nyul'lusisie khusitanda sianje omusaala kwesing'ari siamanemane, neisubili, nomutalasini.

¹⁸Chenda khunyalikhe obuyanzi okhwola olwa busia. Khwefumbilane ma khuhul'le bulahi.

¹⁹Omusaatsa wanje sialiho tawe. Utsiye khuluchendo lwehale.

²⁰Atsiiye nende omukanji kwamapesa mumukhono ne nachelele inyuma wamahonga kabili.”

²¹Khulwa amang'anake amenji amalahi yachila omusiani uyo nasiama, ma namulonda khulwokhul'lomakhwe okhulahi.

²²Habwene yaho omusiani uyo naholola nalondakhwo, singa echulukhi etsitsanga okhusinzwa, nohomba singa imongo etsilwa metsukhan'na,

²³okhwola olwa aholusele luchilasa nilwinjil'la mungurumani yayo. Yali singa eminyi eyeyulanga muluchili, naramanya mbu obulamu bubwe buli musibi.

²⁴Kho luno, abasiani banje, mumbulile nimurechelesia amang'ana kamubool'langa.

²⁵Omwoyokwo kurakor'ra khumukhasi singa uyo tawe, kata orakor'ra mumihandachie tawe.

²⁶Okhuba wafumila abenji ma abenji abaranyala okhubalwa nibafwa khulwaye.

²⁷Inyumbaye neinjila yokhutsia Emakombe. Neinjila inyangu yokhwola khukhufwa bwangu.