Read lunyore TSINJELO 8 Bible Online

TSINJELO 8 - lunyore bible

TSINJELO 8

¹Hulila! Obuchesi bulangisianga, khandi obumanyilisi buchingulanga omwoyo.

²Businjilanga hasikulu sili ahembi neinjila nende musanganjila.

³Habilibwa, mubwinjil'lo bwelitaala, habwinjil'lo bwemiliango, niho habulanjilisinjia.

⁴“Nanganga khwinywe, abandu bosi; Ndakayanga khu buli mundu wosi khusibala.

⁵Inywe abahingwa mumanyilisie akobuchesi, nenywe abahingwa, mube abachesi.

⁶Hulile, amang'ana kanje amalahi, kosi akamuboolanga nakabwene.

⁷Okhuba omunwa kwanje kulaboola akatooto; ne obubeyi bwaisinya.

⁸Amang'ana kosi akomunwa kwanje namalunjikhu; sikalimwo amasiamu kata akobukaati tawe.

⁹Kosi namalunji khu uyo oumanyilisia, nakahabwene khubo abamanyilisianga.

¹⁰Mubukule amebaalo kanje, tawe efetsa, mubukule obuchesi, tawe efetsa inyukhe.

¹¹“Ise nise obuchesi nyombele tsinyuma, ebindu biosi ebiakhenywa sibinyala okhuchelanibwa n'nase tawe.

¹²Ise nise obuchesi ne ndi nende obulwenyukhu, ise ndi nobumanyi nende obukhalachi bwahabwene.

¹³Okhuria OMWAMI nikhwo okhusinyikhila amabi; Ise ndasinyikhila okhwelola nende esunga, tsinjila tsimbi, nende amakhu karali akatooto.

¹⁴Amebaalo, nende obunyali burulanga khuise, obumanyilisi nende obunyali nebianje.

¹⁵Khonyanga abaruchi okhuruka, khandi Abaami okhulomba amalako amalahi.

¹⁶Buli mwami orukanga khusibala akhonyelwanga okhuruka n'nase, kata abakhulundu nende abakhongo.

¹⁷Abayanzanga ise nase mbayanzanga; ne yabo abaarunanga nesinani balaanyoola.

¹⁸Obuhinda nende oluyali ndi n'nabio; yee, emiandu echihindilanga, nende obulunji.

¹⁹Ebiamo bianje nebilahi okhuyomba etsahabu isiyikhu; khandi omukanji kwanje kuyomba efetsa inzelule.

²⁰Njendanga munjila yobulunji, nondanga khunjila yobukhalachi bwatooto.

²¹Yabo abanyanza mbahindihasianga, khandi nzitsusianga tsinyumba tsiabwe nemiandu.

²²“OMWAMI yanomba olwokhuranga mubilonje bibie, khale okhusila nasili okhulombakhwo esindu siosi.

²³Ndali okhulombwa mumatukhu kakhale okhusila, mubuchiachilo, esibala nisisilli khulombwa.

²⁴Ise ndebulwa tsinyanza nitsis'sili okhubaho; kata ebitaho ebietsula amaatsi nibibulaho.

²⁵Ebikulu nibisili okhureebwa mubukono bwabio, ebianikisi nibisili okhubaho, ise ndebulwa.

²⁶Olwa yali nasili okhulomba esibala nende liloba liakhwo, nohomba obuchachilo bwolukuukhi lwesibala.

²⁷Olwa yalomba likulu, ise ndali nindiho; olwa yakhupa ingara khulutungu ndaliho;

²⁸olwa yaraho amalumbesi akokhwikulu; khandi niyara emichela chio munyanza.

²⁹Khandi olwa yalaka amaatsi komunyanza karasila olwakho lwako. Ndali nindiho olwa yalomba omuse kwesibala.

³⁰Ndali hasibafu sisie singa omwana omutoro, ndali nimuyanzizianga buli tukhu, nisangala imbeliwe amatukhu kosi;

³¹ndali okhusangal'la esibala; khandi ninyanzizibwa nabandu bamwo.

³²“Kho luno, abaana banje, muhulile akanje. Mukhole akamboolanga ne mulasangala.

³³Hulile amebaalo, ma mube abachesi, ne murabuchaaya tawe.

³⁴Noweikhabi omundu uyo oumbulilanga, omundu wikhalanga hamuliango kwanje bulitukhu, nalindili'langa mubwinjil'lo bwahango hanje.

³⁵Yabo abaanyoolanga ise banyoolanga obulamu, ne OMWAMI alayanzisibwa n'nabo.

³⁶Nebutswa yabo abaranyoolanga ise, besaalisianga abene; bosi abambihil'lwanga bayanzanga okhufwa.”