Read lunyore TSINJELO 9 Bible Online

TSINJELO 9 - lunyore bible

TSINJELO 9

¹Obuchesi bwombokhele inyumba yabwo. Businjisisie etsisiilo tsiabwo tsine natsitaru.

²Buhan'ne inyama yokhwirwa khulwe lisabo butsokanisie ewaini nende ebihunyanga bulahi ma bwal'le emesa yabwo.

³Burumile abakholi babwo abakhaana okhulangisia siahabundu hosi ahechingu mwitaala nibaboola mbu:

⁴“Buli mundu obula obuchesi yetse yenjile muno!” Naye orali noburechelefu, bumubool'langa mbu:

⁵“Yitsa, oliekhwo khubiokhulia bianje, nonywakhwo khuwaini eyanombele.

⁶Rula mumukanda kwabahingwa ma mobe omulamu. Olonde khunjila yobuchesi.”

⁷Notema okhuchetsiyia abeinjinia olanyoola amanyeko. Ne nolul'la omubi olanyoola imbala.

⁸Orachetsiyiakhwo abeinjinia tawe, balakhusinyikhila khulwako. Nebutswa nochetsiyia abachesi balakhuhelesia oluyali.

⁹Yibaal'la omundu omuchesi, naye alameeta okhuchetsiha; yibaal'la omundu omulunji, naye alameetekha mubumanyi.

¹⁰Okhuhelesia OMWAMI oluyali nibwo obuchachilo bwobuchesi. Noba niwakhamanya Omutsienukhu, olaba nokhumanyilisia.

¹¹Obuchesi bulachila emihika chiobulamubwo chimetekhe.

¹²Niwakhaba omuchesi niwe omwene owakhanyoola obukhala, ne noba nobusuula, niwe omwene owakhasalila.

¹³Omukhasi omuhingwa ayanzanga liyoka, abula obuchesi, khandi wahwa amaatsi m'moni.

¹⁴Yekhalanga hamuliangokweinyumbaye, nohomba khundebe habundu ahechingu mwitaala,

¹⁵nalanga abandu ababiranga, abali khumang'ana kabwe abene naboola mbu:

¹⁶“Oubula obuchesi, abir're muno!” Abool'langa abahingwa mbu:

¹⁷“Amaatsi ameeba namelungu, khandi esiokhulia esilibwanga mubwebisu nesibuulu.”

¹⁸Nebutswa ababula obuchesi tsana sibamanyile mbu abandu abatsitsanga munyumbamwe bafwitsanga khandi yabo bosi abamala okhwinjilamwo bali mutsindungu tsiesibala sie Makombe tawe.