Read lunyore OMUKAMBI 10 Bible Online

OMUKAMBI 10 - lunyore bible

OMUKAMBI 10

¹Tsiisi etsifwiye tsinyala okhuchila amafura kesuswa akali muchupa okhuhunya obukundu; nimbwo obuhingwa obutititi bunyala okhwononia obuchesi nende oluyali.

²Omwoyo kwomuchesi kumwemel'langa okhukhola akahabwene, ne okwomuhingwa kumwemel'langa okhukhola amabi.

³Obuhingwa bubwe bulolekhanga khubandu abacheni, olwa abukananga n'nabo khunjila, amanyianga abandu bosi mbu nomuhingwa.

⁴Omuruchiwo naba nakhuhambila lirima, oralekha emilimochio tawe; okhwehila kalaha khuchilanga amabi amenji kalekhelwa.

⁵Buliho obubi bundi obwa ndabeye okhulola musibala, ne obwatsana bukholwanga nabaruchi.

⁶Abahingwa bahebwanga tsindebe tsiobunyali olwa abahinda nabo bekhasibwanga khutsindebe tsiehasi.

⁷Ndaluutsi abasumba nibachendelanga khutsisululi, ne abandu boluyali nibachenda hasi singa abasumba.

⁸Uyo oyabanga obuko, omwene alakwamwo; ne inzokha elaluma uyo ofutulanga omuluhu mwisisi.

⁹Uyo oyabanga amachina mukware, kalamusalisia; uyo owasaaka tsikwi anyala okhusaalila khulwako.

¹⁰Imbatsoyo neba niyafukuha ne norachiyiakala tawe, okhwola orumikhile tsingufu tsinyinji okhwasaaka. Nakobuchesi okhuloosia amang'ana nikusili khale.

¹¹Inzokha neba nelumaka olwa esili okhurukwa, kho owachiruka siali nobukhala tawe.

¹²Amang'ana kabachesi baboolanga kaleeranga oluyali, nebutswa abahingwa bamumwanga namang'ana kabwe abene.

¹³Bachiakanga okhul'loma amang'ana kobusilu, ma bamalila nende okobulalu obwele.

¹⁴Omuhingwa al'lomel'langa khase na khase. Abulaho omanyile akanakalondekhwo okhwekhola, khandi abulaho onyala okhukhubool'la akakhabeho inyuma wokhufwa khwefwe.

¹⁵Emilimo chiomuhingwa chimuchonyianga; ne samanyanga injila yokhutsia ingowe tawe.

¹⁶Lihanga libetsanga musibi olwomuruchi walio abetsanga omwana muti, khandi olwabemeli balio balitsanga amasabo obutukhu bwosi.

¹⁷Nakeikhabi khwihanga elibetsanga nomuruchi orulanga munyumba indahi, khandi eliabemeli balio balitsanga munyinga indahi, khulwokhunyoola tsingufu ne tawe okhukholwa namalwa!

¹⁸Khulwobukara bwomundu esilama silahobokha; khandi khulwaobutofu bwamakhono ifula elakwa munyumba.

¹⁹Amasabo kachilanga omundu aba nobuyanzi, ne ewaini echilanga omundu atsatsahala, nebutswa sila amapesa, yako sikanyala okhwekhola tawe.

²⁰Oralaama omuruchi, kata mumapaaloko tawe, khandi oralaama abayinda noli musikotisio esiokhukona tawe. Linyonyi linyala okhupulukha libabool'le akawali okhuboola.