Read lunyore OMUKAMBI 11 Bible Online

OMUKAMBI 11 - lunyore bible

OMUKAMBI 11

¹Biikha amapesako mubukhala bwebibala biebucheni, ne inyuma wamatukhu nalebe nonyoole inganga.

²Obiikhe emianduchio mubukono obwinji, obukono bune nabutaru nohomba munane, sichila sionyala okhumanya ikhabi imbi eyanekhwitsile musibala muno tawe.

³Amalumbesi niketsuyemwo amaatsi, kakwisinjia ifula khusibala. Khandi halubeka ahomusaala kuhenganga nikukwa, kata ebe hena, ahakukwiye, niho ahakukonanga.

⁴Noba nolindil'la obusindu nende olweifula nekwe, sionyala okhuraaka esindu siosi nohomba okhuchesa tawe.

⁵Singa obworanyala okhumanya ohomuyeka kurulanga nohomba singa omwana akhulanga munda mwanyina mwana nimbwo oranyala okhumanya amang'ana aka Nyasaye, omulonji webindu biosi akholanga tawe.

⁶Oraake imwoyo mukamba tsuli khandi oraake khumukolooba sichila siomanyile nikali tsiosi natsikhule bulahi, nohomba nelihena khutsio eya nekhule bulahi okhuyomba eyindi tawe.

⁷Tooto mwene, obulafu nobulahi, khandi nakokhuyanzisia okhusangal'la obulafu bwelitukhu.

⁸Osangal'le buli muhika okwoli omulamu. Kata noba niwakhamenya emihika eminji singa mbwena, witsul'le mbu emihika chiokhufwakhwo chiakhabe eminji. Biosi ebiakhetse nebiabutswa.

⁹Inywe ababuukha, musangal'le obubuukha bwenywe. Muyanze olwa musili ababuukha. Mukhole akamwakhenya okhukhola, ma mukhole akemioyo chienywe chiekombanga okhukhola. Nebutswa mwitsul'le mbu Nyasaye yakhamukhalachile khulwa amang'ana kosi akamukholanga.

¹⁰Muralekha esindu siosi simuhendie nohomba simusaalisie tawe, sichila sinamube ababuukha oluhono olurambi tawe.