Read lunyore OMUKAMBI 12 Bible Online

OMUKAMBI 12 - lunyore bible

OMUKAMBI 12

¹Kho witsul'le omulonjiwo olwosili omubuukha amatukhu nende emihika chiesibi nichisili okhwola olwa oliboola mbu “Obulamu sibunyanzisianga tawe.”

²Olwene yilwo nilwo olwe eliuba, nomwesi nende tsinyininyini biakhamwame mutsimonitsio; khandi amalumbesi keifula sikakharuleho tawe.

³Ma amakhonoko akakhusoolanga kakhatechele ne ebilenjebio ebilimwo tsingufu luno, biakharemele. Amenoko kakhabe mati akaranyala okhunyanya esiokhulia, ne tsimonitsio tsiakhamwame sila okhulola bulahi.

⁴Amarwiko kakhekale ne sikakhabe akanyala okhuhul'la liyoka elili mumihanda tawe. Siwakhabe onyala okhuhul'la liyoka lioluchina nilusetsanga obusie tawe. Kata siwakhahul'le amayoosi ketsinyembo etsikhupwanga khubukhana tawe. Nebutswa olwembo lwamanyonyi lwakhakhubuusie okhurula mundoolo.

⁵Wakharie ebianikisio, ne okhuchenda khubilenje khwakhabe okhutinyu. Liswilio liakhakwe tsimbutsi, siwakhabe onyala okhwekhwesel'la omwene tawe, ne obwekombi bwosi bwakhahwe. Khutsitsanga hango hefwe hokhuhulukhila ahenziayo, ma nilwo olwabandu bakhekhuule mumihanda.

⁶Omunyol'lo kwefetsa kwakhakatukhe, ne esihani sietsahabu siakhakwe nisiatikha; omukoye okuli hasitaho kwakhakatukhe ne isongo yamaatsi yakhaatikhe.

⁷Emibili chiefwe chiakhakalukhe mumaloba ne emioyo chiobulamu nichikalukhile Nyasaye owachihaana khu ifwe.

⁸Omukambi yaboola mbu, “Kosi nakabutswa. Amang'ana kosi nakabutswa.”

⁹Ne sichila omukambi yali omuchesi, yatsilil'la okhwibaal'la abandu yako aka yamanya. Yahengelesia tsinjelo ma natsichela mubusubilwa okhumanya akatooto kabwo.

¹⁰Omukambi yarunanga amang'ana kokhuhotselesia nebutswa amang'ana aka yahandika kalimwo obwatooto.

¹¹Amang'ana kabachesi kali singa tsisaala tsinzochi echiabaayi barumikhilanga okhwaya amakondi ne tsinjelo etsiabunjelesibwa netsiokhuhindila singa emisimali echiakhupwa butinyu etsiahaanwa na Nyasaye Omwayi wefwe fwesi.

¹²Nawe, omwana wanje, kaliho akandi akokwana okhuhenga bulahi. Okhuhandika ebitapu sikhuli nesihesi tawe, khandi okhusoma okhwinji khuchonyianga omubili.

¹³Muyako kosi liliho elala eliakhubool'langa: Obe noluyali khu Nyasaye, ma okhole amalakoke, sichila yako konyene niko akomundu akwana okhukhola.

¹⁴Nyasaye alakhalachila amang'ana kosi akakhukholanga amalahi nende amabi kata nende akakhol'lwanga mumambiswi.