Read lunyore OMUKAMBI 2 Bible Online

OMUKAMBI 2 - lunyore bible

OMUKAMBI 2

¹Ndaboola mumwoyo kwanje mbu, “Luno lekha ndeeme okhwesangasia ma mbul'le obulahi.” Nebutswa yako kosi kanyoolekha okhuba akabutswa.

²Nimboola mbu, “Okhutsekha nokhwobusilu, okhwesangasia sikhuleerangakhwo amalahi kosi tawe.”

³Nisukumwanga nobwekombi bwanje, khulwokhunyoola obuchesi, ndakhalaka mumwoyo kwanje mbu ndesangasie khulwokhunywa amalwa ma manyilisie esifune siobusilu. Ndali okhupaala mbu ino niyo injila indahi eyabandu banyala okhumenyelamwo obulamu bwabwe obwimbichiti musibala muno.

⁴Ndakhola amang'ana amakali. Ndeyombokhela tsinyumba khandi ndeerachila emikunda chiemisabibu.

⁵Ndaraaka amatunde ketsimbila tsiosi mumikunda chianje;

⁶ndalima amatubango kamaatsi, khulwokhusama emikunda chianje.

⁷Ndakula abasumba abenji ma nimba nabasumba abebul'lwa munyumba mwanje. Ndali nebiayo ebinji ebiamakondi nende tsing'ombe, okhuyomba bosi abali okhuranjil'la okhumenya mu Yerusalemu.

⁸Ndali ndebunjelechisia efetsa nende etsahabu okhurula mumabiikhilo koburuchi bwetsisoma etsia ndarukanga. Abasaatsa nende abakhasi bemba khulwokhuusangasia ne ndali nabakhasi ababiikha abomundu musaatsa yakhasangaliye.

⁹Yee ndali omukali, ninyomba yabo bosi abali okhuranjil'la okhumenya mu Yerusalemu ne obuchesi bwanje sibwayisimbiakhwo omurwe tawe.

¹⁰Buli esindu siosi esiandekombanga, ndanyoolanga. Sindayeyimakhwo obusangali bwosi tawe. Ndali okhusangal'la emilimo chianje chiosi; ne yikwo kwali omurungo kwanje okhurula mumilimo chianje chiosi.

¹¹Ma nimpaala khubindu biosi ebia ndali nikhol'le khandi obwa ndali nifulukhan'ne butinyu okhubikhola, ne ndamala ninyoola mbu yibio biosi biali ebiabutswa. Kafwana singa okhuteema okhutiila obusindu oburali nobukhala bwosi musibala.

¹²Kata mbwo omuruchi anyala okhukhola butswa akabaruchi abamuranjil'la bakhola. Kho ndachiaka okhupaala khusifune siokhuba omuchesi nohomba omulalu nohomba omuhingwa.

¹³Ma nindola mbu obuchesi buyomba obuhingwa singa obwom'basu kuyomba esiilima.

¹⁴Abachesi balolanga ahabatsitsanga, nebutswa abahingwa sibanyala okhulola tawe. Nebutswa khandi ndamanya mbu liliho ling'ana elala eliliekholekha khu ifwe fwesi.

¹⁵Nimboola mumwoyo kwanje mbu, “Singa obwa kekholekha khumuhingwa, nimbwo kanyala okhwekholekha khu ise khandi; kho nibukhala sina obweise nyooye khulwokhuba omuchesi okhusila?” Ma ningalusia mbu, “Yako kosi nakabutswa.”

¹⁶Omuchesi singa butswa khumuyingwa siyakhetsul'lwe oluhono tawe. Mumatukhu ketsanga fwesi khwakhebil'lwe. Singa obwomuhingwa afwitsanga nimbwo khandi omuchesi okhwola afwe.

¹⁷Kho ninjaaya obulamu sichila akekholanga musibala kosi kali okhunder'ra omunyakhano. Kosi kali akabutswa; khandi ndali nindemanga okhutiila obusindu.

¹⁸Ndali okhusinyikhila emilimo chiosi echia ndanyakhan'na musibala sichila ndali okhumanya mbu okhwola ndekhele omundu undi biosi ebia ndanyoola.

¹⁹Ne niwina omanyile nikali omundu tsana yakhabe omuchesi nohomba omuhingwa? Ngarali ebindu biosi ebia ndafulukhan'na biliba ebibie, nende yibio biosi ebiandanyoola khulwobuchesi bwanje nindi musibala. Yako kosi nakabutswa.

²⁰Kho ndamala nimbelela sichila ndali nindakhola emilimo nesinani okhusila musibala muno.

²¹Onyala okhukhola emilimo khulwokhunyoola esindu khulwobuchesi bubwo khandi khulwobumanyi nende obusitsa ma osilekhe khumundu oranyakhanakhwo okhusikhaaba tawe. Yako kosi nakabutswa, khandi sikali habwene tawe.

²²Ni embwo sina eyomundu yakhanyoola khulwemilimochie chiosi, nende amang'ana aka aloosianga halala nokhunyakhanakhwe olwa ali musibala?

²³Oluhono lwosi lwosili mwoyo esindu siosi esiokholanga sikhuler'ranga butswa esihenda mwoyo nende okhutsunwa omwoyo. Kata obutukhu bwosi amakaniko sikahuluukhanga tawe. Yako kosi nakabutswa.

²⁴Sililiho lilahi khumundu eliyomba okhulitsanga nokhunywa nokhusangal'la emilimochie tawe. Khandi yako nako karulanga khu Nyasaye.

²⁵Niwina owakhanyala okhulia, nohomba okhuhul'la obulahi Nyasaye naraliho?

²⁶Nyasaye ahaananga obuchesi, obumanyi nende obusangali khu uyo wosi omuyanzisianga; ne khumukholi wetsimbi amuhelesinjia omulimo kwokhubunjelesia emiandu nokhuchibiikha kho chibe echinyala okhuhelesibwa uyo omuyanzisia Nyasaye. Yako kosi nakabutswa, khandi kafwana okhutumwa okhutiila obusindu.