Read lunyore OMUKAMBI 3 Bible Online

OMUKAMBI 3 - lunyore bible

OMUKAMBI 3

¹Buli esindu sili neinyinga yasio, khandi buli ling'ana elili musibala lili neinyinga yalio eya Nyasaye yaloosia.

²Eliho inyinga yokhwibulwa nende inyinga yokhufwa; inyinga yokhuraaka nende inyinga yokhuchesa.

³Eliho inyinga yokhwira nende inyinga yokhuhonia, inyinga yokhusambula nende eyokhwombokha.

⁴Eliho inyinga yokhulakaya nende inyinga yokhutsekha, inyinga yokhwekhuula nende eyokhusalama.

⁵Eliho inyinga yokhusalaania amachina nende inyinga yokhubunjelesia amachina, inyinga yokhufumbel'la nende inyinga yokhulekha okhufumbel'la.

⁶Eliho inyinga yokhunyoola nende inyinga yokhukosia, inyinga yokhubiikha nende inyinga yokhufuuba.

⁷Eliho inyinga yokhurandula nende inyinga yokhunaba, inyinga yokhusiling'ana nende inyinga yokhul'loma.

⁸Eliho inyinga yokhuyanza nende inyinga yokhusuula; inyinga yobusoolo, nende inyinga yomulembe.

⁹Nisina esiakhunyoolanga okhurula mubukholi bwefwe bwemilimo?

¹⁰Ndabeye okhulola ebisiro ebia Nyasaye yatuukhile abandu okhukinga.

¹¹Waloosia inyinga indahi khubuli esindu. Khandi wahelesia abandu okhumanyilisia amang'ana akabira nende aketsanga, nebutswa sibali nokhumanyilisia kupu okhwemilimo chia Nyasaye yakhola, okhurula mukhuchaaka okhwola mukhumal'likha tawe.

¹²Manyile mbu libulaho eliyomba okhuyanza nende okhwesangasia oluhono lwakhusili mwoyo tawe.

¹³Fwesi khukwana okhulia nikhunywa nende okhusangalila emilimo chiefwe chiosi, sichila nisio esihanwa sia Nyasaye.

¹⁴Manyile mbu kosi aka Nyasaye akholanga kakhahindile inziayo. Sonyala okhumeetakhwo, nohomba okhuhiiniakhwo esindu siosi tawe. Ne Nyasaye akakholanga kho abandu bamuritsenje.

¹⁵Akaliho n'nondi nohomba akanakekhole niko akalinjiho khale. Nyasaye alekhanga amang'ana kekholekhe hali akhenji.

¹⁶Khandi ndalola musibala mbu kata habundu hobukhalachi, obusiamu bwaliho ne habundu hobulunji, obubi obwaliho.

¹⁷Nimboola mumwoyo kwanje mbu “Nyasaye alakhalachila abalunji nende abasiamu okhuhelana, sichila buli esindu khandi buli esikholwa silekholekhela khunyinga eya siarechekhelwa.”

¹⁸Nimboola mumwoyo kwanje mbu Nyasaye ateemanga abandu okhumanyia mbu bafwana etsisolo.

¹⁹Akekholanga khubandu niko akekholanga khutsisolo. Obwetsisolo tsifwitsanga khandi nimbwo abandu nabo bafwitsanga. Biombi nebilonje ebieimbila ndala. Omundu siayomba esolo tawe, sichila obulamu bwabio biombi bubula esifune.

²⁰Biombi biakhatsie habundu halala naho nimulukuukhi. Biombi biarula mulukuukhi khandi biombi biakhakalukhe mulukuukhi.

²¹Niwina omanyile nikali omwoyo kwomundu kutsitsanga ikulu, ne omwoyo kwesolo nakwo nikutsia hasi khwiloba?

²²Khulweyako ndalola mbu esindu esilahi esiokhukhola nokhusangal'la emilimo chiefwe sichila yikwo nikwo omurungo kwefwe. Sikhulikhwo nende okhumanya akakhekholekhe inyuma wokhufwa khwefwe tawe.