Read lunyore OMUKAMBI 4 Bible Online

OMUKAMBI 4 - lunyore bible

OMUKAMBI 4

¹Khandi ndalola obwabandu basandibwanga musibala. Ndalola amasika ake yabo abasandibwanga, siyaliho owokhubalemia omwoyo tawe. Abulaho owakhabalemisie omwoyo sichila yabo ababasandianga bali nobunyali.

²Khulwe yako ndi nesikhayilwe khuyabo abafwa abamala okhutsia; abene yabo bali bulahi okhuyomba yabo abasili mwoyo.

³Nebutswa okhusila muno, yabo abasili okhwibulwa bali bulahi okhuyomba yabo bosi, sichila basili okhulolakhwo obusiamu obukholwanga musibala muno.

⁴Khandi ndabeye okhunyoola esichilanga abandu nibakhola emilimo butinyu kho bahindihala: kali sichila bakhayilwanga abasiabwe. Nebutswa yako nakabutswa. Kafwana singa omundu oteemanga okhutiila obusindu.

⁵Baboolanga mbu omuhingwa yefumbel'langa sila okhukhola emilimo neinzala nemulia okhwola olwafwa.

⁶Haundi nimbwo kali, nebutswa nobukhala okhuba n'nasio sitititi nooli nomulembe mumwoyo okhuyomba okhufulukhana butinyu etsisaa tsiosi namakhono kabili, noteemanga okhutiila obusindu.

⁷Khandi ndabeye okhulola esindu sindi musibala muno esili esiabutswa.

⁸Aliho omundu omenyanga yenyene. Abula omwana nohomba amwabowe, nebutswa wamenya nakholanga emilimo khasotso, ne siyekuranga obuhinda tawe. Kho niwina owa anyakhan'nanga niyehima amalahi? Yako nako khandi kabula obukhala; nokhumenya khwokhwekhupia esibi okhurali okhulahi.

⁹Babili balikhwo bulahi okhuyomba mulala, sichila banyala okhukhola emilimo nibali halala bulahi ma batoole inganga.

¹⁰Mulala khubo naaba nakwa hasi, oundi alamukhonya okhubuukha. Nebutswa omundu naaba ali yenyene ma nakwa, ali musibi sichila abulaho onyala okhumubuusia.

¹¹Khandi, babili nibaba nibakona halala, balanyoola oluuya; ne omundu yakhanyoola mbwena oluuya nali yenyene?

¹²Abandu babili banyala okhuleka obuseeri obwakhalekele omundu mulala oli yenyene. Omukoye okwabaswa tsinziha tsitaru sikunyala okhukhalikha bwangu tawe.

¹³Omubuukha omutakha oli nomuchesi ali nobukhala okhuyomba omuruchi omusakhulu oli omuhingwa, orahuchil'langa okhwibaal'lwa khandi tawe.

¹⁴Kata nikali yarula mububohe ma naba omuruchi nohomba yebulwa naali omutakha musibala siabwe.

¹⁵Ndakanil'la khumang'ana kabandu abamenyanga musibala, ne nimanyilisia mbu hakari wabwe musikha nabulebe, aliho omubuukha owakhamihe musilenje siomuruchi.

¹⁶Abandu bomuruchi anyala okhuba narukanga banyala okhuba abenji, nebutswa olwa abetsanga narul'leho, abulaho osangal'langa aka yakhaba niyakhola. Kano nako khandi kabula obukhala. Kafwana singa okhuteema okhutiila obusindu.