Read lunyore OMUKAMBI 5 Bible Online

OMUKAMBI 5 - lunyore bible

OMUKAMBI 5

¹Muhenge bulahi olwa muba nimutsitsanga mu Hekalu ya Nyasaye. Nobulahi okhutsiamwo khulwokhweka okhuyomba okhuhaana emisango singa abahingwa bakholanga, yabo abaramanyile mbu bakholanga amabi.

²Opaale mbelio nosili okhul'loma. Oresuhila Nyasaye matetekhana tawe sichila ye Nyasaye ali mwikulu, nawe oli musibala. Khulwe yako amang'anako kabe matititi.

³Esihenda mwoyo sikhuler'ranga amalooro amabi ne okhul'loma amang'ana amenji kachilanga ol'lome amang'ana kobusilu.

⁴Olwa wesuyilanga Nyasaye esiesuho, orachweya okhusihesia tawe sichila siayanzanga obuhingwa tawe. Ohesie aka wesuhanga okhukhola.

⁵Bwakhaba obulahi okhubula okhwesuha okhuyomba okhwesuha ne norahesia tawe.

⁶Oralekha amang'anako kachile okhole tsimbi ma kachile obool'le omurumikhili wa Nyasaye mbu wali okhwitsukhan'na tawe. Esiakhachila Nyasaye akhuhambile lirima nisina? Esiakhachila olekhe Nyasaye yoononie emilimo chiamakhonoko nisina?

⁷Kata obe namalooro amenji mbwena, nohomba kata obe nemilimo emikhaya eminji nende okhul'loma amang'ana amenji, okhwola omurie Nyasaye.

⁸Orachenya noba nolola abaruchi nibakhupianga abatakha esibi khandi nibarahaananga obukhalachi bwahabwene nende okhubula okhuha abatakha akabakhoyele okhukhol'lwa tawe. Buli omukholi waserikali oli ikulu ahengwanga nende oundi omuyombele ne bombi mbwo bahengwanga nende abandi abali ikulu okhubayomba bosi.

⁹Bosi banyoolanga khubichese biomumukunda, ne kata omuruchi naye anyoolanga omukabwakwe khubio.

¹⁰Oyanzanga amapesa siyekuranga amapesa tawe. Uyo owekombanga obuhinda sanyoolanga biosi ebimuhela tawe. Yako khandi nako nakabutswa.

¹¹Olwemiandu chimeetekhanga, yabo abachilitsanga nabo nibameetekha; kho mwenechio anyoolangakhwo sina nikhurali okhuchilola butswa netsimoni?

¹²Tsindoolo tsiabakholi bemilimo netsimbuulu, kata olwa baba nibaliiye bitititi nohomba ebinji. Nebutswa abahinda bali n'nabio ebinji ma kata bibahendianga emioyo nibabula okhunyoola tsindoolo.

¹³Buliho obubi bundi obukali obwandolanga musibala muno: abandu babiikhanga amapesa kabwe khulweinyinga nalebe ma kabasaalisia.

¹⁴Bakakosianga kosi mumang'ana karalimwo ikhabi ma basikala nibaralikhwo nesindu siokhulaamila abaana babwe.

¹⁵Singa obwomundu yarula munda mwanyina narali nesindu nimbwo khandi yakharule musibala sila esindu siosi. Kata khukhole emilimo mbwena sikhwakhatsie nesindu tawe.

¹⁶Akene yaka sikali amalahi tawe! Khukalukhanga butswa singa obwa khwetsa. Khunyakhananga khumilimo nikhuteema okhutiila obusindu ne nisina esiakhunyoolanga?

¹⁷Khumenyianga obulamu bwefwe musiilima, nomusibeela nomusihenda mwoyo nomwirima nende mubutekhele.

¹⁸Kano niko aka ndabeye okhunyoola: esindu esilahi esiomundu anyala okhukhola nokhulia, nokhunywa nende okhusangal'la emilimochie chiosi echia akholanga musibala, amatukhu matititi aka Nyasaye yamuhelesisie, sichila yikwo nikwo omurungokwe.

¹⁹Nyasaye naba nahelesia omundu emiandu nende obuhinda, ma amuhuchil'le okhuchirumikhila nachisangal'la, omundu uyo akwana okhukhupila Nyasaye embwo nende okhusangal'la emilimochie. Yisio nesihanwa okhurula khu Nyasaye.

²⁰Khulwa mbu Nyasaye wamuhuchil'la okhuba nobusangali, sialaba nesihenda mwoyo esinji khulwamatukhuke matititi akaali mwoyo tawe.